ORANJESTAD,Aruba
Algun siman pasa a anuncia cu poco poco lo reanuda servicionan di Hospital. Bou di esaki tambe ta cay e consulta cu specialistanan cual no a stop di traha durante e pandemia di Covid-19, pero a sigui brinda servicio te unda tabata por via telefon of personal. Loke si e pandemia di Covid-19 a trece cune cu operacionnan cu tabata pendiente a keda posponi paso a tuma luga solamente operacionnan di emergencia. Awor poco poco lo purba di yuda tur pashent pero segun grado di urgencia.
Loke sigur a haci na tur policlinica ta zorg pa cada uno mantene na e normanan stipula pa DVG cu ta reduci riesgo di contaminacion den forma di minimalisa aglomeracion di hende den sala di espera den cuadro di social distancing y pone na cada entrada handsanitizer.
Tambe ta pidi cada pashent activamente pa atende nan consulta na ora y yega solamente 5 minuut prome pa evita aglomeracion den sala di espera. Tambe ta pidi cada pashent pa acudi nan cita nan so, y solamente ta permiti compañante si tin motibo valido. Si encaso e sala di espera ta mucho yen na momento di bo yegada lo pidi bo persona pa warda den auto te ora di bo cita.
Na ora di confirma e cita lo pidi bo persona si bo tin cualkier di e sintoma nan di Covid-19. Si esaki ta e caso lo consulta cu e specialista encarga y lo dicidi si bo persona por acudi e cita y si esaki ta e caso lo pidi bo persona pa bisti un mondkap.
Nos kier a pidi tur hende pa keda atento y alabes ta pidi cooperacion mirando cu e regla na e policlinica nan di speclialista por cambia si encaso Aruba haya su mes cu un di dos ola di Covid-19. Si tin cualkier pregunta por fabor tuma contacto cu e oficina di bo specialista.
