KRALENDIJK, Bonaire
Pa otro siman djárason ta bira konosí bou di kua kondishon bishitante por bolbe biaha pa Boneiru. Un plan pa realisá esaki ta den desaroyo. Den e plan ta pone salú públiko na promé lugá.
Esaki a palabrá durante un reunion di Gezaghèbernan di islanan BES huntu ku Sekretario di Estado Paul Blokhuis di Salubridat. E reunion a tuma lugá djabièrnè 5 di yüni. Nan a reuní despues ku a bira konosí ku desde 15 di yüni por biaha den Reino. Den e reunion a bai di akuerdo ku Boneiru ta bini ku su mes plan basá riba e situashon di prekoushon di nos isla. Boneiru mes ta disidí tambe ki dia esaki lo drenta na vigor.
Den e plan ta indiká bou di kua kondishon personanan por drenta Boneiru. Konseheronan di Gezaghèber Edison Rijna a indiká ku pa otro siman e plan akí por ta kla. Punto di salida di e plan ta ku mester protehé salubridat públiko na Boneiru. Te ainda tabatin dos kaso di infekshon ku e vírùs di corona na nos isla. Niun di e dos kasonan akí no a resultá den mas infekshon. Den e plan ta tene kuenta kon bon Boneiru ta prepará pa posibel kaso di infekshon ku e vírùs di corona den futuro. Asina e plan ta aprobá lo informá komunidat. Gobièrnu di Boneiru ta enfatisá ku biahamentu bou di e situashon aktual ta trese riesgo kuné. Gobièrnu di Boneiru no ta karga niun responsabilidat pa esnan ku no por regresá nan pais bèk ora por ehèmpel bolbe sera espasio aéreo