ORANJESTAD,Aruba
Dia 15 di Mei ultimo RdA a duna un resumen di actividadnan ora a tuma over e facilidad despues di e terminacion di e contract cu Citgo. Teniendo cuenta cu e regla nan vigente di COVID-19 na e momento ey, y considerando cu tanto FMSA y TdEA (Termina di Energia Aruba Nv) ta ser considera companianan esencial, e reglanan vigente y protocolnan tawata ser aplica na ambos compania, entre otro opera cu un minimo di personal y asina atende solamente cu trabounan cu tawata necesario.
FMSA a sigi cu su operacion pa distribui fuel pa e mercado local, y lo sigi haci e trabou aki como compania bou di RdA. TdEA a keda ocupa su mes di ricibi cargamento di fuel via barco y traspasa esaki pa FMSA segun e operacion normal. TdEA tambe ta keda encarga pa suminstra e fuel pa WEB riba un operacion continuo. Ambos compania ta companianan cu ta resorta bou di RdA completamente como companianan di Gobierno y lo no tin cambio den esaki.
Despues di a ricibi tur e ofertanan di e “fast-track-tender” pa lease capacidad di tanki, awor ta ta haciendo e screening necesario di e gruponan identifica como posibel cliente(nan) pa e terminal.
RdA lo ta e compania cu lo cera e lease contract cu e cliente(nan) ora yega asina leuw. Esaki ta premira pa sosede den e simannan nos dilanti. Mientras tanto den corto tempo lo bay cuminsa cu e trabou nan di inspecion y preparacion pa trece e terminal bek den funcion segun normanan internacional pa por atende e prome barconan cu lo trece producto pa almacena den e tankinan parti pabou na Zeewijk.
Na mes momento ta trahando tambe riba e proceso pa atrae partidonan interesa den rehabilitacion di e refineria y/of otro industria cu igualmente lo genera cuponan di trabou y cu naturalmente lo tin su debido impacto riba economia di Aruba. E proceso ta premira cu lo tuma un tempo mas largo pa concretisa.
Segun cu e proceso ta desaroya RdA lo sigi informa Aruba debidamente.
