ORANJESTAD,Aruba
Siman pasa durante reunion publico pa atende situacion di enseñansa na nos isla, parlamentario di Fraccion di POR a haci entrega di dos mocion cu ta sali na defensa di nos hendenan. E prome ta na bienestar di nos studiantenan.
Durante e reunion aki, varios punto a ser aclarea door di e mandatario y Howell ta confia cu awo por reina mas trankilidad den mundo di enseñansa, pasobra si esaki no pasa na final esnan cu ta wordo perhudica ta nos studiantenan.
Alan Howell ta lamenta cu a pesar cu e mocion presenta door di su persona no tin ningun tinte politico, y ta sali na defensa di futuro di nos studiantenan, toch esnan den oposicion, specificamente esnan di fraccion di AVP no a sostene e ayudo cu a wordo pidi pa e studiantenan.
E mocion pa mustra e sosten na e studiantenan pa medio di flexibilisacion di e ‘bevorderingsnormen’ ta bisa: Considerando cu Covid 19 a afecta enseñansa en genaral na Aruba; cu scol a cera for di mitad di maart 2020 y te cu awe mayoria di scol ta cera ainda; cu ‘homeschooling on line’ a trece hopi dificultad pa maestronan y studiantenan; cu segun estudio haci pa Departamento di Enseñansa, 40% di e muchanan no por a haya les online na un manera optimal pa diferente motibo; cu segun estudio di Departamento di Enseñansa 90% di maestronan tabatin dificultad pa prepara e materia y duna e les online; cu ta imposibel cu e studiantenan sali perhudica di e crisis den enseñansa door di Covid-19; cu apesar di Covid-19, hopi maestro y studiante a haci nan best pa sigui lesnan online. Ta dicidi di urgi gobierno pa flexibilisa e ‘bevorderingsnormen’ pa scolan basico y avansa pa asina evita cu nos studiantenan sali perhudica mirando cu e situacion actual ta fuera di alcance di scolnan, maestronan y studiantenan y ta imposibel pa evalua e studiantenan optimalmente.
Alan Howell lo keda monitorea e desaroyo di e situacion den enseñansa y ta sigura cu el lo bela pa esaki bay den e direccion corecto unda interes di esnan envolvi ta wordo salvaguardia, pasobra na final esun cu ta gana ta nos propio isla, Aruba y e si tin interes di nos hendenan nap echo.
