KRALENDIJK,Bonaire
E temporada nobo di orkan ta kuminsá ofisialmente riba djaluna 1 di yüni. E ta dura te fin di novèmber. Sea bon prepará pa esaki. Insufisiente preparashon pa un orkan por tin influensia riba bo siguridat durante un desaster di orkan.
Aña pasá durante temporada di orkan nos a parti un foyeto di orkan na kuater idioma pa tur kas di famia na Boneiru. Konsultá e foyeto aki pa informashon pa prepará bo mes pa un tormenta tropikal òf orkan. Den e foyeto tin tambe kiko nos ta hasi durante un orkan i kua number di emergensia bo por yama. Bo no tin e foyeto mas? E ora ei ‘download’ esaki via nos wèpsait www.bonairegov.com.
E informashon aki bo por lesa tambe den nos app: Disasterprep Bonaire. Por download Disasterprep Bonaire via iTunes i Google Play. Den e app bo ta lesa kon bo por prepará bo mes pa diferente kalamidat. Den dje bo ta lesa kiko Entidat Públiko Boneiru ta hasi. I kua ta e number di emergensia i nos medionan sosial. Via e app Entidat Públiko Boneiru por manda mensahe importante pa tur usuario.
Nos tin un tim di kombatimentu di desaster ku ta prepará su mes pa un krísis òf kalamidat i ta kombatí esaki tambe ora e tuma lugá. E tim ta kordiná ku diferente instansia (polis, kuerpo di bombero, dòkter, kuido di poblashon) kiko tin ku pasa ora ku tin peliger durante i despues di un orkan òf tormenta tropikal. Banda di esei nos ta sòru pa shèlter pa hendenan ku no ta seif mas den nan propio bibienda.
