ORANJESTAD,Aruba
Dia 2 di mei 2020, ta haci net 50 aña pasa cu e Vuelo 980 di ALM a accidenta durante su biahe di New York pa Sint Maarten. E avion aki, un DC9, ALM a huur for di Overseas National Airlines (ONA) y e contract ta encera cu lo haci uzo di personal di cockpit di ONA y personal di cabina di ALM. Dia 1 di mei 1970, e vuelo di ALM a sali for di Corsou pa New York y semper riba e vuelo aki tin un team di personal trahando y un team extra cu tabata biaha como pasahero. E team cu ta biaha como pasahero su siguiente dia ta traha riba e vuelo cu ta sali for di New York pa Sint Maarten y ta regresa New York mesun atardi. E tripulante aki tabata consisti di Capitan Balsey de Witt, Copiloto Harry Evans y navigado Hugh Hart di ONA den cockpit y e personal di cabina di ALM tabata Purser (Hefe di Cabina) Wifred Spencer, e steward Tobias Cordeiro y e stewardess Margareth Abraham. Riba e dia tragico, esta diasabra 2 di mei 1970, na caminda pa Sint Maarten e vuelo a bin topa cu un masha mal tempo mes cu un visibilidad casi nulo y door di esaki mester a desvia e vuelo pa St. Croix. Pero lamentablemente combustibel a caba net 30 miya for di costa di St. Croix y e capitan mester a baha (ditch) e avion den lama Caribe. Esaki tabata pa mas of menos 3 or di atardi. Den e avion tabatin un cantidad di 57 turista Americano y e tripulacion di 6 persona. Cu ayudo di e tripulacion, cu semper tabata haya un bon entrenamento, por a conta 42 sobreviviente. Lamentablemente tabatin un perdida di 21 persona, bou di cual tambe e stewardess Margareth Abraham. E noticia aki sigur den e tempo ey tabata uno devastado, no solamente pa famia di Margareth y su prometido, pero pa e famia henter di ALM. Te dia di awe semper e ex-coleganan di ALM ta keda recorda e suceso tragico aki cu e perdida di un di nan. Manera Señor Etiennne La Cruz, cu tabata trahando riba e vuelo di dia 1 di mei 1970, ta conta den su buki; 33 aña riba 33 mil pia: “Despues cu mi a caba di haci mi trabou, mi a sinta un bon rato combersa cu Margareth riba tur sorto di topico y ainda mi ta mir’e den e asiento patras riba e DC8. Loke mi no ta lubida tabata su eterno sonrisa, e tabata semper contento.” Señora Iris Kock ta conta cu e y Margareth a cuminsa den e mesun grupo di stewardess y despues a bula hopi hunto. Iris tambe tabata riba e vuelo di dia 1 di mei y tabata trahando, hunto cu Etienne. Iris tabata wardando riba su amiga Margareth den hotel unda nan tabata kedando, pa despues di e vuelo nan bay haci cumpra di casamento, ora cu a sali un noticia riba television cu e avion di nan coleganan a baha riba lama. Ta te laat den anochi e tripulacion di Vuelo 980 a yega hotel tur lora den deken y e momento ey a bin realisa cu Margareth no tabata hunto cu nan. Iris tambe ta conta cu su amiga-colega Margareth tabata un persona semper alegre. Madeleine (Maddy) Pappers tambe tabata un otro stewardess di ALM cu tabata na New York dia cu e accidente a pasa.
Nan tur tabata hunto den hotel wardando regreso di e personal di e vuelo for di Sint Maarten. Y ora nan a haya sa e noticia tur a yora di tristesa y Maddy ta bisa cu ta algo cu nunca mas e por lubida. Un otro colega di e tempo ey ta Señor Mirto Granadillo, cu tambe tabata traha como personal di cabina. Mirto ta conta cu e tabatin hopi contacto mes cu Margareth, principalmente den e ultimo dianan di Margareth su bida. Mirto hunto cu Purser Spencer y Margareth, tabata forma parti di e team cu mester a traha riba e vuelonan cu e avion di ONA. Te awe Mirto por memorisa Margareth perfectamente combersando tocante su preparacionnan pa su pronto casamento cu Señor Robby Schouten y su sonrisa y un hari masha caracteristica di dje. Un otro colega-amiga di Margareth tabata Aura Croes cu despues a casa cu van Ommeren, cu tambe ta recorda Margareth. Aura ta conta cu un par di dia prome cu Margareth a bay bula su ultimo vuelo el a yama Aura pa bis’e cu e ta bay busca su shimis di casamento. Margareth tabata den nubia y e tabata masha feliz mes. Esakinan ta algun bunita recuerdo di e coleganan di e tempo ey y cu nunca nan por lubida nan colega Margareth Abraham. Pa recorda cu ta haci 50 aña di e suceso aki y teniendo cuenta cu e situacion actual, Señor Robby Schouten, cu tabata prometido di Margareth, a haci un peticion special riba e Ex-ALM’ers pa organisa un ceremonia cortico den memoria di Margareth y pa recorda tur esnan cu a perde nan bida den e tragedia. Na Corsou un grupo chikito di ex-personal di cabina, na un forma unico a benta flor bibo den lama y tambe a haci un acto special na aeropuerto di Corsou caminda e relievo di Margareth ta poni. Na Aruba tambe un par di Ex-ALM’ers, representando henter e grupo di Aruba, a haci un homenahe chikito door di tira algun flor bibo den lama pa recorda e fecha tristo, esta e tragedia di Vuelo 980 di ALM.
