KRALENDIJK,Bonaire
Kontrario na Hulanda te ainda no a registrá ningun kaso di infekshon ku vírùs di corona. Pa e motibu ei nos isla no tin ku tuma medida èkstra manera Hulanda a hasi djaweps último, asina gezaghebber Edison Rijna a deklará. ‘Esei no ta nifiká ku nos ta sinta ketu. Nos ta preparando nos mes bon riba un situashon kaminda lokalmente tin kasonan di infekshon ku vírùs di corona. Nos ta monitoriá e situashon hopi bon i te ainda no tin ningun motibu pa intrankilidat.’
Gezaghebber ta presidente di e Tim di Maneho Insular (Eilandelijk Beleids Team – EBT). E tim aki ta bini den akshon na momentu di kalamidat i krísis manera un epidemia. ‘Den e Tim di Maneho Insular tin representante di entre otro Fundashon Mariadal, polis, kuerpo di bombero, mareshosé, kapitan di haf i dunadónan di ayudo. Dentro di e Tim di Maneho Insular nos a reuní un par di biaha kaba tokante kon kada miembro ta prepará su mes. Nos ta den kontakto tambe ku nos islanan ruman i Hulanda i nos a hasi bon palabrashon tokante kon nos por yuda otro. Huntu nos ta tene kuenta ku tur posibel senario.’
Segun Rijna nos siudadanonan no tin mester preokupá ku e vírùs lo plama pa medio di e turistanan krusero ku ta bishitá nos. Turista krusero por baha solamente for di barku si e barku entregá un dokumento bálido na kapitan di haf tokante salú di e personanan na bordo, un Maritime Declaration of Health (deklarashon marítimo di salú). Na aeropuerto ta monitoriá e pasaheronan bon. Mareshosé ta alerta riba pasaheronan ku ta bini for di un área di riesgo.
Gezaghebber ta hasi un yamada riba nos pueblo pa sigui e konsehonan pa evitá ku e vírùs ta plama. ‘Mi ta hasi un yamada riba tur hende pa laba man ku regularidat, nister i tosa den èlebog i hasi uso di lensu di papel. E konseho ta tambe pa no duna otro man.’ Rijna ta enfatisá ku nos siudadanonan mester ta konsiente di e echo ku e situashon na Boneiru por kambia un ora pa otro. ‘E chèns ku e vírùs ta aparesé na Boneiru ta grandi. Dentro di e Tim di Maneho Insular nos ta tene kuenta ku esei.’
Ta konsehá siudadano ku durante e último dos simannan tabata den un área di riesgo i awor tin keho manera kentura, difikultat pa hala rosea òf ta tosa hopi, pa yama nan dòkter di kas. Nan por yama tambe na 777 2239. Pa informashon general tokante e vírùs siudadano por yama 715 5311, òf subi e página di facebook di Entidat Públiko Boneiru (Openbaar Lichaam Bonaire) i di Gobièrnu di Boneiru.
