ORANJESTAD,Aruba
Awe merdia 23 di April 2020 un team di 21 di e 35 profesionalnan cu ta consisti di medico y enfermeronan registra y specialisa den cuido intensivo y calamidad a yega for di Merca pa sostene y reinforsa Hospital pa amplia e capacidad di cuido pa asina hospital por normalisa su cuido regular bek. E asistencia di e profesionalnan aki for di Merca tur ta forma parti di e pakete total di ayudo cu a wordo manda via hulanda pa Aruba y e otro islanan.
21 di e 35 profesionalnan cu mester a bin Aruba a keda ricibi pa representante di Ministerio di Salud, Hospital, Inspectie Volksgezondheid Aruba (IVA) y DVG. Conforme e maneho di cuarenta na e momentonan aki, e personanan aki lo keda nan 14 dia den cuarentana y lo volg e protocol di hospital pa cu cuarentena di “Zorg Verleners”. Mientrastanto nan lo cuminsa traha riba un plan y training pa Aruba conhuntamente cu Hospital y inspectie.
E tareanan cu e team aki ta bai tin ta entre otro pa sostene e personal di ICU na Hospital y duna training riba tereno di ICU pa cu maneho di pashentnan cu COVID-19. E team aki lo bai keda Aruba pa un duracion di 45 dia y si tin mester lo extende esaki. E team aki ta consisti di profesionalnan cu experiencia amplio den cuido intensivo mundialmente.
Esaki ta un stap hopi importante cu nos como pais mester tin pa asina e ICU su capacidad ta bon ekipa na momento cu nos ta bai scale down.
Minister Dangui Oduber ta hopi satisfecho y agradecido na e ayudo y cooperacion di Hulanda pa esaki. E ayudo aki sigur lo yuda grandemente den cuadro di expansion di capacidad medico. Aruba ta conta awor tambe cu expansion di personal.
