ORANJESTAD,Aruba
Prome cu tratamento di presupuesto 2020 luna pasa, Prome Minister Evelyn Wever Croes a haci un yamada durante un transmision na television, cu e ta spera cu mirando e situacion cu corona virus a hinca e pais aden, cu tur hende lo laga politica un banda y sostene e presupuesto aki.
Parlamentario di fraccion di AVP, sr Michael Lampe a mustra cu e mensahe aki dirigi mas tanto den direccion di fraccion di AVP, tabata solamente un grito politico ya cu realmente e actual gobierno ta sigui insisti pa sirbi interes di su amigo-, famia- y sponsornan, prome cu e sirbi interes di pueblo.
Mientras cu Prome Minister Wever Croes ta pidi pa laga politica un banda, su persona ta bira actua contra su propio palabranan.
Durante tratamento di e futuro di e refineria CITGO dos siman pasa, mi persona a trece dilanti durante di e reunion aki, cu mirando e calamidad cu Aruba y paisnan rond mundo ta confrontando, awor aki ta momento pa uni y pone mentalidad partidistan un banda pa nos sera un Aruba fuerte pa hunto nos enfrenta e crisis aki.
Prome minister por a interpreta esaki den diferente forma por ehempel pa crea un base pa wak posibilidad di forma un gobierno nacional of scucha puntonan cu opposition ta trese padilanti den parlamento pa habri un caminda cu por tin un base di sosten mas amplio y serio.
Mi persona a sugeri esaki mirando e magnitud di e situacion cu tin y pensando riba e forma mas efectivo cu pueblo completo lo por ta representa den e decisionnan fuerte y serio cu mester wordo tuma.
Sinembargo e reaccion di Minister Presidente tawata totalmente for di luga, tratando na ridiculisa e peticion y observacion.
Esaki mustrando pues cu promer minister tin un mentalidad cu claramente no tin e interes di pais na prome luga.
Su persona a suplica pa laga interes politico un banda, ta pidi pa tur hende cera cabes pa atende cu e situacion cu nos ta bibando aden pero ora cu e momento yega pa busca e union aki, e interes politico di Evelyn Wever Croes ta bin na prome luga.
Ya caba durante di e reunion riba CITGO a keda confirma cu e interes di cierto grupo cerca di partidonan den gobierno ta bin na prome luga ya cu na luga di reuni pa busca e miho forma pa atende cu e situacion di crisis cu Aruba ta pasando aden, ta regla refineria CITGO, ta regala miyones di florin na un compania miyonario pa despues bin papia cu trahadonan publico tin cu entrega.
A bin Parlamento pa informa cu lo bay tin un operado nobo pa e refineria pero manera ya caba Prome Minister a haci den pasado, di tur e companianan cu su persona tin contacto cu nan, ningun tin nomber, ningun e tin informacion pa duna Parlamento y ta otro fastball cu e ta pasa pueblo di Aruba.
E situacion actual ta algo hopi serio y hopi delicado y na momento cu un Prome Minister cabes di un gobierno ta bin dilanti y den su prome mensahe ta papia di retiro y reduccion di salario di trahadonan publo, sin presenta un plan sikiera di loke kier logra pa nos deal cu e crisis aki.
Mientras tanto pueblo ta den inseguridad y ta boga pa decisionan serio di un gobierno serio cu ta traha pa interes di nos isla na promer luga.
“Awor ta momento pa lidera y no hunga politica cu no ta benificia Aruba,” Parlamentario Michael Lampe a declara.
