ORANJESTAD,Aruba
Departamento di Salud Publico awe mainta a wordo informa cu un persona mester a fayece. Informacion cu a wordo suministra ta cu e persona aki lo tawata tin algun dia cu algun sintoma di Covid19.
Segun protocol DVG a instrui su personal specialisa riba malesanan infeccioso pa acudi na e localidad y haci e investigacion nesesario. Test di COVID-19 a wordo tuma for di e defunto y a instrui famia pa mantene cuarentena mientras ta warda e resultado di e test di COVID-19.
Investigacion haci por a saca afo cu central di 911 a ricibi un yamada indicando cu tin un pashent cu sintoma di COVID-19. Central di 911 a informa e persona na telefon pa yama 280.0101 pa por haci e test corespondiente.
Diagnostic Center tambe a ricibi un yamada telefonico indicando un persona cu sintoma pa cual motibo a invita e persona pa pasa e siguiente dia pa test.
Lamentablemente Centro Diagnosico ni tampoco central di 911 a wordo informa cu e pashent tawata hopi critico y mester ayudo urgente.
Awe tardi resultado di test haci riba e fayecido a keda cla y ta indica cu e persona tawata COVID-19 positivo.
Esaki sigur ta lanta un precupacion grandi mirando cu informacion ta indica cu e persona aki tawata frecuenta den ful e bario y tawata gusta para na un supermarket y cuinda tur persona cu pasa.
Segun e mama e dia anterior su jui ainda tawata move den e bario cu e posibilidad di a plama e virus.
Departamento di Salud Publico ta haci un jamada na comunidad di Paradijswijk pa si tin personanan cu por tawata tin contacts cu e persona aki den e dianan cu a pasa. Pa por fabor yama rapidamente Centro Diagnostico na 280.0101 pa un test.
Update riba www.arubacovid19.org lo tuma lugar mañan merdia manera custumber.
![Persona Cu A Fayece Ayera Nochi Na Paradijswijk A Test Positivo Pa Covid-19 155 Whatsapp Image 2020 04 15 At 19.21.52](https://www.earubianonews.com/wp-content/uploads/2020/04/WhatsApp-Image-2020-04-15-at-19.21.52-450x600.jpeg)