ORANJESTAD,Aruba
Minister di Husticia mr. Andin Bikker diamars atardi tabata den conferencia di prensa unda el a gradici un biaha mas tur e instancianan cu ta traha den e linea di candela, e ‘first responder’. Nan ta, Cuerpo Policial, esunnan cu ta traha cu ambulance, esunnan cu ta traha den servicio medico, hospital, Eerste Hulp, CEA, Guarda nos Costa cada cuerpo cu ta brindando servicio 24/7 den circunstancia hopi dificil. Tambe Minister Bikker a haci un apelacion civico na comportacion di cierto ciudadano pasobra a constata cu un grupo di persona cu cara tapa a dicidi di ataca cuerpo di bombero cu piedra y diferente artefacto causando no solamente daño material pero tambe pone na peliger bida y salud di e personanan di cuerpo di bombero. Dialuna cuerpo di bombero a bay paga un candela na San Nicolas y eynan un grupo di persona cara tapa a ataca nan y pa Minister di Husticia esaki ta algo inaceptabel. Pa varios siman tabata bayendo bon unda a sinti un trankilidad pa loke ta trata e Toque de Queda cu mas y mas e pueblo a cuminsa custuma cu esaki ta algo necesario. Toque de Queda y ningun otro medida no a bin pa molestia ningun hende, pero a bin cu nan pa garantisa salubridad di e pueblo. Mas lihe cu por sigui observa tur e pasonan cu a tuma, mas lihe por bay bek na trankilidad y normalidad. Minister Bikker ta lamenta ora cu Cuerpo Policial, Cuerpo di Bombero, CEA y otro departamentonan ta wordo yama pa duna asistencia den caso di calamidad, cu nan ta wordo confronta cu un grupo chikito cu tipo di incidentenan asina cu no tin sentido cu e la yama zinloos geweld. Hopi di e dienst nan aki tin asina tanto tarea, sali di nan cas riscando nan propio salud y observando oranan laat di trabou y confronta cu un grupo chikito di persona cu aparentemente no kier compronde cu Aruba y mundo henter ta pasando den un crisis y den retonan sin precedente. Pa yuda cu e reto aki mester di cooperacion di cada conciudadano y tambe esunnan pa un motibo of otro a bay over na e accion aki. Segun e mandatario lo no tolera e tipo di accionnan aki y ta bay actua cu man duro contra e personanan aki. Minister ta spera cu nan compronde e mensahe cu nan comportacion ta inaceptabel y ta bolbe haci un apelacion na cada conciudadano y special na e personanan cu un motibo of otro a bay over na tipo accionnan sin sentido pa nan recapacita. Mester duna cooperacion civico pa comunidad bay hunto dilanti y surpasa e retonan aki sin precedente.
