ORANJESTAD,Aruba
Parlamento di Aruba a trata diahuebs ultimo e ley pa apodera 3 minister esta Minister
President, Minister di Financien y Minister di Infrastructura pa por firma y termina e
contracto cu CITGO conosi como e “Termination Agreement”.
Richard Arends masha masha nevioso kisas ta sconde algo?
Lokual a resalta durante e debate aki cu a bay como 12 ora largo ta e actuacion y
comportacion di Richard Arends di AVP. Richard Arends kende ta autor y esun cu a forma
parti di tur negosacion di e contracto di CITGO dado momento a bira masha masha
nervioso unda den su betoog apenas por a papia. Cu un stem temblando e tabata suplica
gobierno pa No kere CITGO. Alaves e tabata suplica Gobierno pa No kere cu CITGO No
tin plaka paso di acuerdo cu Richard Arends cu CITGO tin hopi plaka.
Richard Arends a forma parti di e Wine Dine & Dance den e negosacion:
Dado momento Parlamento no por a compronde e plegaria di Richard Arends tampoko
por a decifra su comportacion nervioso y precupacion. Hustamente Richard Arends a front
gobierno di AVP den e grupo di negosacion pa cu CITGO y tabata parti di e “Wine & Dine
and Dance” cu Roberto Rincon den su mansion na Housten cu escort service. Alaves a
biaha den avion priva di e ehecutivonan aki cu awe ta sera. Kisas pa e motibonan aki
Richard Arends sa cu CITGO tin plaka y a keda roga Gobierno pa No firma e Termination
Agreement y pa NO kibra e contracto? Lokual Richard Arends no a splika y tampoko a
reaciona riba pregunta di diferente Parlamentarionan pakiko AVP, ( Mike Eman, Mike de
Meza y Richard Arends) no a firma contract e CITGO cu tin plaka esta CITGO Petroleum
Corporation? Pakiko a Richard Arends y “gang” a firma cu CITGO Holding Aruba LCC,
CITGO Aruba Refinery y CITGO Aruba Termninal 3 CITGO lanta den pura, bashi y sin
plaka? Ta pa e motibo aki CITGOnan lanta na Aruba no tin plaka pa inverti. Potretnan
recien a ilustra den e estado critico cu tanto e Refineria y Terminal ta aden y cu e
CITGOnan bashi No a cumpli cu nan contract y obligacion.
Richard Arends a cuestiona gobierno cu gobierno lo kier bende e Terminal:
Lokual a straña tur hende durante e debate ta momento Richard Arends cu un stem
temblando a cuestiona Gobierno cu Gobierno lo kier bay bende e Terminal. Esaki ningun
momento ta e caso. Lo contrario cu su Gobierno di AVP kendenan na 2016 si kier a bende
e Fuel & Marketing Supply Aruba y esaki a wordo splika te hasta den e Memorie van
Toelichting di e Ley AB 2016 no 50 paraaf 8. Textualmente redacta “ Het land is
voornemens deze aandelen tijdelijk onder te brengen bij RDA, VOORUITLOPENDE op
een mogelijke verkoop van Valero Marketing & Supply Aruba N.V. aan een derde partij.
Geschatte marktwaarde 40 miljoen”. Gobierno actual semper a papia di lease e Terminal
pero no duna ni bende ningun operador. Pa e motibo aki a lanta un compania di pais
Aruba ( TDEA) esta Terminal Di Energia Aruba pa garantisa cu e Terminal di awor pa
futuro keda den man di Pais Aruba y pues keda di Pueblo.
Richard Arends hopi nervioso kisas paso su number lo hunga?
Finalisando Parlametario Endy Croes no por a decifra e nerviosismo di Richard Arends
durante henter e reunion. E tabata “gaga” y su stem constantemente temblando. Richard
Arends tabata bruha yen di cos cu otro. Momento cu Endy Croes a entrega e mocion pa
exigi RDA dentro di 4 siman bin duna amplio splikacion na Parlamento riba e rapport
Forensico cual awor ta kla, Richard a bandona sala y a regresa te bandi 9pm anochi
momento di votacion. Kisas Richard Arends ta precupa cu awor cu e terminacion di e
contracto ta bira realidad mas liher e berdad lo bin dilanti y pueblo lo mira cuanto miyones
el a strika den henter e deal aki? Kisas Richard Arends ta precupa cu e rapport
Forensico? Kisas Richard su number tambe ta bay hunga pronto? Puitonan lo sali awor
for di e macuto y Ministerio Publico pronto lo tin bastante mas trabou. Tempo ta e mihor
amigo di pueblo.
![Parlamentario Endy Croes: Durante Reunion Di Citgo Richard Arends Hopi Nervioso Ta Tembla Y Ta Gaña So 155 Image 7](https://www.earubianonews.com/wp-content/uploads/2020/04/Image-7.jpeg)