ORANJESTAD,Aruba
Net awor cu Aruba ta pasa den e crisis mas grandi den su historia Mike Eman concientemente kier haci uzo di e momento pa crea un momentum politico pa su mes y su partido. Mike Eman ta e ultimo persona cu por papia di finanzas publico y economia, mirando cu el a haya 8 aña oportunidad pa maneha esaki y nos tur sa cu e resultado tawata devastador pa pais Aruba. Nos ta lamenta cu na mes momento e kier malinforma pueblo riba CITGO y instiga pueblo contra e maneho cu ta wordo hiba door di e profeshonalnan durante e crisis.
TERMINACION CU CITGO UN OPORTUNIDAD NOBO PA ARUBA
Ta incomprendibel cu pa Mike Eman y AVP un oportunidad nobo pa pais Aruba ta wordo considera como algo malo. Net aworaki cu alrededor di 25 mil persona a perde trabou y pais Aruba lo perde alrededor di 950 miyon florin na entrada un oportunidad nobo, cu terminacion di e contract cu CITGO ta algo hopi positivo. Pueblo sa cu e CITGO di AVP tawata un aventura di Mike Eman cu no a trece cupo di trabou, no a percura pa nos economia crece y tampoco tawata tin un efecto positivo riba nos GDP. Nan a uza CITGO como instrumento pa malgasta 21 miyon florin den RDA y presupuesta fondonan ficticio na 2016 y 2017 pa cera un presupuesto.
MALINFORMA PUEBLO RIBA MANEHO DURANTE CRISIS
Enbes di elogia tur e profeshonalnan cu ta traha dia y anochi durante e crisis aki na bienestar di nos tur, Mike Eman ta scohe pa cuestiona e profeshonalnan. Na mes momento crea panico y purba di saca probecho politico durante un momento dificil pa pais Aruba. Ta incomprendibel cu Mike Eman ta cuestiona e structura di maneho di crisis y tur e departamentonan cu ta responsabel pa nan tareanan durante e crisis aki.
Kiermen practicamente Mike Eman ta cuestiona e “first-responders”, dunadornan di cuido, personal di ambulance, tur e departamentonan di e cadena hudicial, departamento di salubridad publico, departamento di asuntonan social, DOW, ATA, Directie Luchtvaart, Hospital, AZV, Directie Wetgeving, Brandweer y Ministerio Publico. Como fraccion nos kier un biaha mas enfatisa cu nos tin solamente elogio pa e trabou duro cu tur e empleadonan aki ta eherce y nan profeshonalismo ta duna nos un sentido di trankilidad durante e crisis aki.
MANEHO FINANCIERO Y NOS ECONOMIA
Durante e ultimo reunion publico Gabinete Wever-Croes a duna un splicacion amplio di e pasonan cu lo tuma pa yuda comercio. E siman aki tin un plataforma lo wordo institui caminda comercio henter por ta di balor agrega pa hunto cu Gobierno yega na solucionnan pa mitiga e impacto riba comercio. Esaki banda di locual Gobierno mes a anuncia caba.
Pues nos no ta compronde e informacion incorecto cu Mike Eman ta trece pa dilanti pa crea panico. Esaki sigur no despues cu liderazgo di Mike Eman a resulta den deficitnan desastroso cu un piek di 444 miyon florin na 2014. Esaki ta un tercera parti di e suma cu tin mester aworaki durante e crisis. Kiermen den tempo bon mes Mike Eman tawata crea debe astronomico, imaginabo kico esaki lo ta durante un crisis di e indole aki.
PA CONCLUI
Aworaki nos mester para uni y para fuerte pa Aruba y ta orguyoso di tur profeshonalnan cu ta traha duro, riesga nan propio salud pa bienestar general. Nos ta spera cu Mike Eman compronde cu e mester pone su interes personal politico y su interes partidista un banda aworaki. Nos tin tur confiansa cu, cu poder di Dios, bou liderazgo di nos prome minister, sra.mr. Evelyn Wever-Croes nos lo surpasa e retonan actual.
![Rocco Tjon: Durante Crisis Mike Eman Kier Malinforma Pueblo, Fomenta Rabia Y Crea Panico. 155 Rt 13042020](https://www.earubianonews.com/wp-content/uploads/2020/04/RT-13042020-800x533.jpg)