ORANJESTAD,Aruba
Mientras cu tur merdia y anochi Prome Minister Evelyn Wever Croes ta dilanti television pidiendo y exigiendo di pueblo pa keda paden pa nan no yuda plama e viruos COVID-19, maniobranan y manipulacion ta tumando luga pa reparti propiedad di pueblo. Na momento cu pueblo ta sufri y tin cu entrega, ta indulta compania biyionario mas cu 300 miyon.
Mike de Meza, miembro di fraccion di AVP ta mustra cu e mesun dia cu Prome Minister ta participa na pueblo cu lo bin cu medida mas fuerte, ta organisa un conferencia di prensa di Refineria di Aruba, ya cu aparentemente esey ta un di e negoshinan esencial cu tin.
“Loke den e caso aki nos por papia di dje, ta cu loke ta esencial na Prome Minister Evelyn Wever Croes y su gobeirno, ta di reparti e propiedadnan di pueblo di Aruba den refineria pa amigo y famianan, pa sponsornan di campaña, pa loke ta trata e oil terminal y terenonan di e refineria.
Ora cu bay mira e lista formula pa Prome Minister y su gobierno pa loke ta negoshinan esencial cu por funciona den e tempo aki di corona virus, ningun caminda ta para refineria pero fuera di maneho di e situacion cu tin pa loke ta salud di pueblo, acuerdo cu CITGO y kende lo haya pa maneha e oil terminal ta mas importante na e momentonan aki.
Tin indicacion cu tin mas reunion tumando luga pa loke ta e refineria y areglo cu CITGO, cu e tempo cu gobierno ta dunando pa logra sosten financiero pa esunnan cu a perde nan trabou y na comercio local.
Ta un hecho bon cla caba cu gobierno ta purando henter e proceso di e refineria mey mey di un pandemia serio pa mundo henter y nos pais pero aparentemente ta manipulando tras di cortina pa bolbe perhudica pueblo den su totalidad.
Un conferencia di prensa cu ta bisa hopi di e manipulacion bisto cu ta tumando luga, sigur di un gobierno cu ta papia constantemente di transparencia pero cu ta bisa awor cu tin 18 compania interesa den e refineria (ya kaba e lista di 25 compania a krimp), di cual 15 ta interesa den e oil termina y solamente tres pa loke ta reapertura di e refineria.
Aki tampoco gobierno ta menciona nomber di e tres companianan aki, mescos cu tanto Prome Minister Evelyn Wever Croes como Minister Andin Bikker ainda debe pueblo nomber di e tantisimo companianan cu nan a papia cu nan cu ta interesa den e refineria.
Riba dje Prome Minister a manda su mucha manda den persona di Richard Eman manera un payaso politico, bin papia di un asunto cu e no tin experticio aden, cu no sa unda su cara ta para y simplemente ta un popchi cu mester haci loke e ta wordo ordena pa haci.
Loke tambe a cay manera un sorpresa grandi pa tur hende ta e hecho cu recientemente a nombra ex Minister di Infrastructura Otmar Oduber den Hunta di Comisario di RDA, cu ta bolbe lanta hopi pregunta ta kico ta tumando luga cu propiedad di pueblo. Awo ta cobra overbruggingstoelage y entrada di RdA. Pero pueblo si mester entrega!
Ta mesun persona aki kende a bandona politica pa bay yuda su yiu den su negoshi pero awor tin tempo pa funciona como miembro di Hunta di Comisario di RDA, pues ta kedando den e mundo politico y no a bira lomba pa esaki.
Sin duda presencia di su persona, cu semper a vocivera y demonstra di ta contra e refineria, awe den e hunta di comesario ta otro confirmacion cu tin manipulacionnan tumando luga, cu tin cosnan pasando caminda pueblo lo ta e ultimo pa haya sa kico ta pasando cu su propiedad caminda claramente ta trata di hinca e propiedad aki den mano di amigo y sponsornan”. Awor definitivamente final di refineria na Aruba, ayo ora cero y RdA na caminda pa bira e Serlimar part II, Parlamentario Mike de Meza a declara.
![Parlamentario Mike De Meza Pa Sirbi Interes Di Amigo, Famia Y Sponsor Situacion Di Corona Virus Por Warda Un Rato Pa Un “Fastball” Urgente 155 Apr10 Mike De Meza Citgo](https://www.earubianonews.com/wp-content/uploads/2020/04/APR10-MIKE-DE-MEZA-CITGO-400x600.jpg)