ORANJESTAD, Aruba
Parlamentario Endy Croes ta lamenta masha hopi e politica baho cu AVP ta hungando den temponan dificil di crisis alrespecto Citgo.
Tempo pa Uni y para banda di Aruba:
Segun Parlamentario Endy Croes e momentonan aki ta e momento husto y corecto pa tur Arubiano y tur nos rumannan biba na Aruba pa brasa otro y pone tur nanishinan den mesun direcion pa nos por logra pronto saca Aruba bek for di e situacion di crisis aki. No ta momento pa ta negativo pero ta e momento pa harmonisa y laga positivismo briya for di nos y sigur pa ta solidario cu otro. Pesey Parlamentario Endy Croes ta hasi peticion riba oposicion pa sostene e ley den Parlamento pa apodera Ministernan pa por firma y kibra e contracto cu Citgo.
AVP a comete un error graval asumiendo tur daño ambiental desde Lago:
Parlamentario Endy Croes ta splika cu de e reunion proximo unda lo trata e Termination Agreement lo apodera e Ministernan pa kibra e contracto aki. Lo ilustra den e debate aki diferente artikel den e contracto di CITGO cual a resulta di ta hopi malo y desfaborabel pa pais Aruba. Pueblo tin derecho di sa kiko a tuma lugar. Lamentablemente cu ta awor apenas nos por prueba con AVP a firma un contracto tumando tur e dañonan ambiental y terenonan contamina desde tempo di Lago, Coastal, El Paso, Valero y Wickland Oil bou responsabilidad di Pais Aruba exonerando tur e companianan aki di tur daño ambiental pa casi un siglo. Asina a firma e Definitive Participation Agreement cu CITGO regalando CITGO un free ride. CITGO ta bira responsabel solamente desde cu el a tuma over 10 di Juni 2016 enadelante y lokual a pasa promer cu e tereno nan Aruba tinie den su scochi awor. Parlamentario Endy Croes ta haña esaki un capitulo hopi scur den historia di nos pais cu a wordo scondi pa pueblo. Parlamentario Croes ta bisa cu ta imposibel cu ambientalistanan por tabata na altura di esaki pero en toda caso awor nos tur sa.
Parlamentario Endy Croes ta considera artikel 9 mescos “Gato den Saco”
Art. 9 Pre existing environmental liabilities, conditions, and or issues caused by Previous Owner -Operator. Pues e titulo aki ta papia di problemanan y responsabilidadnan ambiental pre-existente causa pa doño y operadornan anterior. ( Lago, Coastal, El Paso, Valero y Wicklandoil).
Aunke e contracto ta uno hopi elabora nos ta kere ta husto pa pueblo conose e berdad. Den mesun artikel 9 ( Exhibit 9.1.1B) Parlamentario Endy Croes lo mustra klaramente con AVP mediante AVP a firma e contracto aki tumando tur e daño ambiental y terenonan contamina desde Lago bin ariba pa Pais Aruba y a sconde e parti aki pa pueblo. E artikel den e contracto definitivo ta bisa textualmente lo siguinte “ RDA, the Government and the other Government Parties will be jointly and severraly liable for for and shall idemnify, defend and hold harmless the Investor Parties ( CITGO) and their respective Affiliates for any and all Third Party Liabilities arising or resulting from or relating to any Pre Existing Environmental Conditions all as further provided in the implementing Agreements and the Investor and its Affiliates SHALL NOT, NOW OR IN THE FUTURE, be liable for ANY PRE EXISTING Environmental Conditions.” Esaki ta “gato den saco”. Aruba a asumi aki un reponsabilidad miyonario cu Aruba nunka mas lo por cumpli cune. Parlamentario Endy Croes ta pidi pueblo keda pendiente pa e reunion publico cu lo mester wordo jama den simannan nos dilanti. Un persona ta grandi momento e reconose su error. Pesey Parlamentario Croes ta pidi AVP para banda di Pueblo den e momentonan mas cu pueblo tin mester di esaki y sostene e ley pa apodera Ministernan pa kibra dicho contract y ohala den futuro cercano un operador nobo por renoba y maneha e terminal creando cupo di trabou y entrada pa pais Aruba primoridialmente cu actualmente rond mundo tin scarsedad den storage.
