ORANJESTAD, Aruba
Dentro di poco Parlamento lo trata e ley pa autorisa Gobierno di Aruba termina relacion cu CITGO. Pa hopi tempo tin negosacion entre Citgo y Gobierno riba pagonan di empleado, inversionnan cu no a tuma lugar di parti CITGO, debe di Huur y impuesto. Despues di hopi luna di negosacion a yega na e palabracion cu Citgo ta bay paga su debe di impuesto, cual ta 16 miyon dollar. Tambe Gobierno a exigi pa CITGO cumpli cu e trahadornan y tur a ricibi un pakete teniendo na cuenta nan beneficionan y
añanan cu nan a labora den refineria.
For di basta tempo ta claro cu Citgo no por cumpli cu e contract. Un contract cu Gobierno di AVP por cierto a firma cu CITGO. Esaki mirando cu tin embargo riba cuentanan di Citgo relaciona cu e sancionnan imponi pa gobierno mericano. Expertonan di parti Gobierno, expertonan diparti CITGO y expertonan imparcial a conclui cu CITGO no tin placa pa paga nan huur y tampoco pa haci e inversionan necesario na e terminal y den e refineria. Pues no ta resta pais Aruba otro opcion pa termina relacion cu CITGO y capitalisa riba oportunidadnan nobo cu e terminacion aki lo crea pa nos economia.
DEFINITIVE PARTICIPATION AGREEMENT
Importante pa nota cu for di juni 2016 tin intentonan ta wordo haci pa logra reapertura di refineria y funcionamento optimal di e terminal. Pero debi na sancion mericano CITGO ni PDVSA por yega na e fondonan necesario pa renoba y inverti. Pa e motibo ey pa basta tempo caba tur trabou pa un reapertura ta practicamente paralisa. Debi na esaki CITGO mes a duna di conoce cu nan no lo por cumpli mas cu palabracionnan haci den e “definitive participation agreement” y ta desea di termina esaki.
IMPLICACION PA PAIS ARUBA
Mirando locual a wordo treci pa dilanti e ta cumbini pais Aruba pa termina e contract cu CITGO. Esaki lo duna nos e oportunidad pa capitalisa riba un oportunidad nobo. Establece un refineria nobo of un industria nobo cu ta crea cupo di trabou. Aworaki mas cu nunca esaki ta necesario mirando e crisis cu nos ta aden. Ta importante si pa e terminacion aki wordo regla atraves di un ley cu ta tene cuenta cu e aspectonan legal (civil).
Mester tene na cuenta cu e situacion na Venezuela ta uno inpredicibel, casonan den corte cu CITGO sin tin siguransa cu decision lo cay na fabor di pais Aruba ta largo (añanan) y costoso. Aworaki mirando situacion cu pais Aruba ta aden no tin espacio ni placa pa esaki. Na mes momento si no actua te hasta e terminal, cual por nifica un entrada grandi pa pais Aruba si logra restaure por completo, ta na peliger.
PA CONCLUI
Nos ta enfatisa un biaha mas cu e ley aki no ta duna CITGO ningun dispensacion di placa. E ta termina e “claim” di pais Aruba riba CITGO, pa asina por busca un operador nobo pa nos refineria y percura pa nosterminal por funciona optimalmente. Tin hopi interesado den e refineria y e terenonan y pais Aruba ta den necesidad pa un segundo pilar economico. Esaki ta un oportunidad unico pa mas liher cu ta wordo anticipa nos recupera di e crisis actual.
![Rocco Tjon: Termina Relacion Cu Citgo Ta Nifica Un Oportunidad Nobo Pa Aruba 155 Rt 31032020](https://www.earubianonews.com/wp-content/uploads/2020/03/RT-31032020-800x534.jpg)