ORANJESTAD,Aruba
Aña pasa mi a registra na Camara di Comercio (KvK) un ‘eenmanszaak’ cu proposito di ofrece turistanan estadia via Airbnb. Despues di algun dia, KvK a yama pa avisa mi cu como cu mi ta un stranhero (naci na Corsou!), mi mester busca un permiso di DEACI (Department of Ecomic Affairs, Commerce and Industry of Aruba). Solamente stranheronan mester pidi permiso di DEACI pa por sigui cu negoshi na Aruba.
DEACI a cobra mi 400
florin (tur persona no naci na Aruba mester paga esaki pa inicia un negoshi na
Aruba) pa nan por cuminsa tramita e peticion, sin garantia cu e permiso lo
wordo otorga. Despues di algun siman, DEACI a yama mi pa puntra si mi tin
intencion di hospeda turista stranhero tambe. Mi contesta tabata “Naturalmente.
Mi no ta pensa cu ‘turista’ di Santa Cruz, Noord of San Nicolas ta bay reserva
cupo na mi luga via Airbnb”.
“Wel, si ta asina”, DEACI a adverti mi, “bo mester presenta un ‘Business Plan;
Taxatie Rapport; Financiërings Plan’.” E exigencianan aki supuestamente a bin
di Ministerio di Turismo pa sigura cu e facilidadnan cu ta ser ofreci na e
turistanan lo ta di nivel acceptabel pa Aruba Tourism Authority (A.T.A.). E
exigencianan aki tabata parce mi hopi straño. Pero, e ta aplicabel solamente
pa stranheronan, no pa e Arubianonan, pasobra mi a wordo manda pa DEACI despues
cu KvK a ripara cu mi ta naci na Corsou.
Ademas DEACI a adverti mi cu turistanan stranhero mester paga e ‘toeristen heffingen’ di $ 3.- pa dia y .95% di e total di gastonan cu nan ta paga.
Esaki a pone mi pensa. Si mi tabata un Arubiano, lo mi no mester a bay DEACI y mi por a ricibi turistanan stranhero sin e advertencia cu lo mester cobra e ‘toeristen heffingen’? Kiermen cu e politica discriminatorio di e maneho di dunamento di permiso ta perhudica Aruba, pasobra e turistanan stranhero cu hospeda cerca un Arubiano no lo wordo cobra e heffingnan.
Despues cu mi a cuminsa opera mi Airbnb, mi tabatin e experiencia cu un turista a bisa mi cu el a caba di keda na un Airbnb na Paradera y nan no a cobr’e ningun heffing. Un investigacion chikito cu mi a haci a comproba cu hopi Airbnb na Aruba maneha door di Arubiano, no ta cobra e heffingnan. Pa colmo, algun di esnan cu ta cobra, no ta transferi e placa pa DIMP. No tin ningun control.
Entre tanto, mi a ricibi turista di Estonia, Francia, Spaña, Hulanda, Italia, Republica Checo, Brazil, Colombia, Peru, y di diferente region di Merca y di Canada. Den apenas tres luna mi a ricibi 18 ‘reviews’ di e huespednan, tur 18 ta di 5 strea. Airbnb a nombra mi ‘Super host” y mi a entrega na Depto di Impuesto casi 2.400 florin di ‘toeristen heffingen’ cu mi a cobra di e huespednan.
Mi ta kere cu e ministerionan envolucra den e proceso di duna permiso pa opera un Airbnb mester establece un sistema di control y revisa e proceso di nobo, pa sigura cu tur cu haya permiso, Arubiano y stranhero, ta ofrece “facilidadnan na nivel aceptabel pa A.T.A” na nos turistanan, ta cobra e ‘toeristen heffingen’ y ta transferi nan na DIMP. Esaki lo ta mas husto pa stranhero y Arubianonan y mas beneficioso pa nos isla y su turismo.
![Discriminacion Den Maneho Di Dunamento Di Permiso Pa Airbnb Ta Perhudica Aruba. 156 Apartment](https://www.earubianonews.com/wp-content/uploads/2020/03/apartment-800x506.jpg)