ORANJESTAD,Aruba
Diamars dia 24 di maart tabatin un reunion publico den Parlamento di Aruba den cual e presupuesto di anja 2020 di pais Aruba a ser trata. E presupuesto aki aunke el a yega 6 luna laat Parlamento tog a trat‘e den un tempo record. Esaki ta debi na e coronavirus COVID 19 y su consecuencianan pa nos pais. Gobierno a presenta un nota di cambio cu a modifica e presupuesto drasticamente. Aki tin un deficit di 1.3 biyon pa cual gobierno ke bai fia placa. Ademas gobierno a pidi pa modifica un ordenanza nacional. Por a nota con Parlamentarionan di tur signatura a uni y coopera pa e presupuesto por a ser trata. Wyatt-Ras no por a asisti na e reunion pa motibo cu e ta den “cuarentena” despues di a regresa for di un viaje na Merca. Den consulta cu su coleganan el a tuma e decision pa no bai e reunion. Su coleganan de Meza y Lampe tambe a notifica griffier di nan decision. Esaki pa cumpli cu loke ta prudente den e casonan aki cu DVG ta indica ora di bin di viahe di exterior. Segun e parlamentario ta importante pa banda di cuida nos mes pa nos cuida otro. Na momento cu presidente di Parlamento a anuncia cu Wyatt-Ras ta den cuarentena e parlamentario a ser aserca dor di cantidad di persona pa puntra p’e. Wyatt-Ras ta gradici tur cu a yama, manda whatsapp, e-mails y hasta a bin wak na su cas si e ta bon. Mervin Wyatt-Ras ta informa un y tur cu e ta den perfecto estado di salud y cu dentro di par di dia e “cuarentena” ta finalisa. Wyatt-Ras ta invita un y tur cu ainda ta yega di exterior pa tuma e cuarentena na serio. Keda cas pa 14 dia pa prevencion. Wyatt-Ras ta kere tambe cu nos mester mantene 2 meter di distancia for di otro y pa tur hende tuma e malesa aki na serio y keda nan cas y sigui consehonan di DVG encuanto higiena. E parlamentario aki desde januari di e anja aki a bin ta puntra minister di Salud encuanto e malesa aki y con prepara gobierno ta pa combati e malesa aki. Wyatt-Ras a haci alavez pregunta si tin un plan di contingencia y si ta controla na frontera. Ta te na maart e minister di Salubridad a bin Parlamento pa contesta preguntanan. Pa despues anuncia cu tin un caso cu a bira 2. Den tempo corto desde 13 di maart e cantidad di casonan a aumenta rapido te 17 caso cu e chens cu esaki lo aumenta mas ainda. E hecho aki ta preocupante, segun Wyatt-Ras, sabiendo nos capacidad limita di facilidadnan y material en comparacion cu otro paisnan. Ademas e consecuencianan laboral y social. Wyatt-Ras tin palabra di elogio pa tur dunador di cuido cu ta tuma riesgo pa nan bida pa atende cu casonan y den nan trabou diario. Ademas esnan cu ta mantene orden publico y esnan cu ta transporta otronan. Palabra di aprecio ta bai pa tur esnan cu ta traha den tienda, negoshinan y cu ta atende cu hende tur dia. Nos tur tin cu uni pa stop e malesa aki. Aunke ta dificil tin cu tuma distancia social pa nos por evita contagio.
![Ta Urgi Un Y Tur Pa Banda Di Cuida Nos Mes Di Covid 19 Nos Cuida Otro 155 Image 1](https://www.earubianonews.com/wp-content/uploads/2020/03/image-1.jpg)