ORANJESTAD,Aruba
Parlamento di Aruba a aproba e presupuesto di emergencia pa resto di aña 2020, como tambe autorisacion na Gobierno pa bay fia 1.3 biyon di florin. Gobierno a indica cu parti di suma aki ta destina pa duna alivio y sosten financiero pa esnan cu a perde trabow, trahadornan independiente y empresanan mediano y chikito. “Nos fraccion ta apoya e sosten financiero, pero ta haña cu esaki mester ta dirigi cu criterionan specifico y bou un maneho of supervision estricto. Loke cu Gobierno a presenta no ta cumpli cu e exigencianan aki,” asina parlamentario pa fraccion di AVP, Sr. Richard Arends, a declara.
“Gobierno a aplica parcialmente un scenario calcula pa Banco Central: Gobierno no a reduci su gastonan compara cu e presupuesto inicial – e concepto prome cu e crisis relaciona cu e coronavirus. Tampoco Gobierno a presenta un plan di likides di e fondo di seguro medico (AZV), ni di e fondo di seguro social (SVB). Gobierno a tene cuenta cu estimadonan basta amplio cu parce mas un carte blanche,” Sr. Arends a splika. “Gobierno a presupuesta inversion na valor di 40 miyon di florin, pero no a duna un indicacion di ki tipo di inversion ta papiando di dje, ni den ki termino.”
Parlamentario Arends ta di opinion cu e sosten financiero mester a wordo aloca den un fondo special cu un presupuesto separa y cu un control pa e alivio yega unda e mester yega y pa e tin efecto. E fondonan aki mester wordo usa eficientemente y e sosten brinda mester ta efectivo, pero tambe totalmente depolitisa. “Gobierno a opta sinembargo pa aloca e suma aki bou ministerio di Asuntonan Social. Esaki ta ensera cu un trahador independiente of un comerciante mediano y chikito mester pasa door di un procedura similar na ora cu un persona ta pidi onderstand pa haña e sosten necesario,” e la splika. “Departamento di Asuntonan Social simplemente no tin e conocemento den cas pa por brinda guia na empresanan como cu no ta nan area di maneho. Ademas e proceso di aplicacion pa ricibi sosten financiero ora bo perde bo entrada como trahador a bira un laberinto burocratico contrario na loke a wordo anuncia inicialmente.”
Fraccion di AVP lo a prefera di duna un apoderacion teniendo cuenta cu caida di nos economia te cu mitar di aña enbes di un paralisacion te cu final di aña manera cu Gobierno a propone; y cu e alivio ta sali di un fondo separara y cu un structura di supervision. Pero Gobierno no tabata tin oido pa esaki. Segun Parlamentario Arends, implementacion den fase lo por hasta agilisa e proceso di aprobacion den Conseho di Minister di Reino, pasobra pa por subi mercado internacional of pa por fia di Hulanda bo mester di e aprobacion ey. Como cu fraccion di AVP ta haña si cu e sosten financiero na e momento aki ta necesario, no kier a duna objeccion na e presupuesto y a abstene.
“Cu e fiansa grandi aki e debe nacional ta aumenta di 4.3 pa 5.6 biyon. Si e aumento di 30% aki ta suficiente nos no sa, p’esey mester keda semper cu e posibilidad pa por stuur. Gobierno no a presenta un plan economico pa empresanan cu mas di 50 empleado, ni tampoco un maneho pa jumpstart e actividadnan cu nos ta conoci cu nan, pero tampoco pa diversifica nos economia bou di e realidad nobo cu mundo ta bibando aden,” Parlamentario Arends a finalisa bisando.
![Sosten Financiero Ta Necesario, Pero Supervisa 155 Img 9938](https://www.earubianonews.com/wp-content/uploads/2020/03/IMG_9938-800x488.jpg)