ORANJESTAD,Aruba
Miembronan di Fraccion di POR, Dellanire Maduro y Alan Howell a sostene presupuesto 2020 di pais Aruba. Diamars, durante un reunion hitorico debi na e situacionnan di distanciamento social y crisis den cual nos ta bibando aden, a aproba e presuesto di nos isla cu un deficit di 1.3 biyon Florin.
Fraccion di POR ta considera cu tabata hopi importante pa pasa e presupuesto aki cu ta contene e fondonan pa atende cu e crisis den cual nos pais ta pasando debi na e pandemia di Covid-19. Ta lamentabel cu despues di a haya un presupuesto unda nos pais lo a conta cu un surplus di 40 miyon Florin, den apenas algun siman esaki a cambia por completo y a bay te na un deficit di 1,300 miyon Florin.
Pero mescos cu e ta lamentabel, por bisa cu e ta demostra un curashi grandi pa den un periodo asina cortico, logra hinca un plan den otro pa yuda nos pais y nos hendenan den un di e periodonan mas dificil cu nos a yega di pasa aden.
Fraccion di POR lo keda vigila e fondonan aki y sigura cu nan wordo inverti na e manera corecto y na bienestar di nos poblacion. Tambe kier a probecha e ocasion pa gradici tur esnan a traha incansablemente pa logra haci e cambionan necesario den un termino asina cortico.
