ORANJESTAD, Aruba
Aruba Airport Authority N.V. (AAA), cu ta opera y maneha Reina Beatrix International Airport (AUA Airport) a bin ta siguiendo tur instruccion duna door di Gobierno di Aruba (GA) pa loke ta referi na prevencion y evita plamamento di e virus COVID-19.
E instruccionnan ta inclui un prohibicion di biahe pa pasaheronan cu ta yega, cu excepcion di ciudadanonan di Aruba cu kier regresa e isla memey di e crisis mundial di COVID-19. Esaki no ta afecta e pasahero cu ta bandona e isla mesora, aunke cu aeropuerto ya caba a notifica e cambionan na e pasaheronan y loke ta wordo conseha. Pasaheronan ainda ta wordo pidi pa ta na aeropuerto tres ora prome cu nan vuelo, y no mas prome. Aeropuertonan rond mundo ta atendiendo un volume mas grandi di pasahero cu mester a corta nan plannan di biahe pa bolbe cas mas tempran debi na e diferente prohibicionnan di biahe rond mundo.
Den e esfuerso di AUA Airport pa asisti e aerolineanan di e miho forma, a bin ta manteniendo tur aerolinea y pasaheronan alto tanto di e ultimo desaroyonan y medidanan tuma, como tambe cambionan, a base diario.
Aunke cu e miho conseho ta keda pa e pasaheronan mantene nan mes den contacto directo cu nan aerolinea, AUA Airport ta consciente cu aerolineanan tambe ta experencia un volume halto di peticionnan urgente y preguntanan. Pa tal motibo, ta conseha pasaheronan pa sigui AUA Airport via e plataformanan di social media of website pa keda informa di tur e medidanan cu ta afecta biahamento pa y for di Aruba, como e miho forma di comunicacion.
Ta importante tambe cu AUA Airport ta brindando apoyo na Departamento di Salud Publico den control di e personanan yegando.
Biaheronan por ta sigur cu limpiesa y siguridad di tanto pasaheronan como e empleadonan di e aeropuerto ta prioridad pa gerencia. Adicionalmente, medidanan interna ta wordo sigui pa mantene e siguridad y limpiesa aki.
Si surgi mas cambio den e instruccion y medidanan di Gobierno di Aruba, aeropuerto lo mantene e pasaheronan informa via di www.airportaruba.com y via di otro canalnan di rednan social.
![Aeropuerto Ta Informa Di E Cambionan Pa Biahamento 155 New](https://www.earubianonews.com/wp-content/uploads/2020/03/new--800x463.jpg)