ORANJESTAD,Aruba
Den historia di nos pais, semper e pueblo Arubiano a para hunto y fuerte contra cualkier
situacion dificil poni nan dilanti. Awe un biaha mas nos pueblo tin cu para firme contra di un
adversidad si mas serio cu nos a yega di conoce cu ta carga e nomber di coronavirus (COVID-
19). Un reto mundial cu no ta keda sin afecta nos. Miyones di hende ta luchando contra di e virus
aki tratando di minimalisa y contene su efecto den cada sociedad. “Den momentonan dificil
manera esun cu nos ta pasando aden, ta corecto pa nos tur pone atencion na loke expertonan ta
avisando henter comunidad, sigui nan instruccion y conseho pa asina evita expansion y contagio
di e virus aki,” lider di fraccion Sr. Marlon Sneek a declara den nomber di fraccion di AVP.
For di diabierna Gobierno di Aruba a bin ta informando comunidad riba e diferente accionan cu a
tuma lugar, entre otro, distanciamento social, hygiene y evita aglomeracion. Expertonan a duna
hopi informacion y a informa pueblo riba medidanan di precaucion cu mester a tuma. Esakinan
ta alcansa un limite cu nunca antes nos a conoce aki na Aruba, pero cu ta medidanan sumamente
necesario na e momentonan aki pa evita un escalacion di e virus aki. Por surgi situacionnan cu no
ta mucho alentador riba plano laboral. Ta reina un incertidumbre hopi grandi den sector turistico,
principalmente den e mundo hotelero, cu ta e base di e pilar principal di nos economia.
Empleadonan cu ta mira cambionan di cerca pero nan no sa kico futuro lo speranan. Tambe
trahadornan independiente y empresanan mediano y chikito cu ta e weso di lomba di nos
economia.
“Como fraccion di mas grandi den Parlamento di Aruba nos ta hasi un yamado na ciudadania pa
cumpli cu nos responsabilidad civil den esaki. E sacrificio cu ta wordo exihi ta sin precedente pa
nos bida diario: no laga pa e ta en vano,” Sr. Sneek a bisa. Fraccion di AVP ta sigui comprometi
tumando contacto y dunando informacion valioso y necesario na comunidad, supervisando
henter e proceso implementa pa Gobierno, caminda interes di tur hende tin cu wordo tuma na
cuenta.
Den e momento dificil aki, mi persona como tambe henter fraccion y partido di AVP, ta urgi un
y tur pa traha hunto, pa tira bista riba otro, percura pa sigui instruccionnan pa proteccion personal
y di higiena. Ban cuida e gruponan cu ta mas vulnerabel den nos comunidad, esunnan cu tin
menos proteccion y duna un man caminda cu tin mester. Na mes momento ban carga nos
responsabilidad cu seriedad: evita na plama informacionnan cu no ta corecto den comunidad,
creando ainda mas panico cu ya caba nos conoce.
“Na tur esnan cu ta labora den cuido medico y orden publico: danki, forsa y perserverancia.
Hunto manera semper e pueblo di Aruba a demostra, nos lo supera e contratiempo aki y nos sali
miho for di dje,” lider di fraccion di AVP, Sr. Marlon Sneek, a declara.
