ORANJESTAD, Aruba
Minister di Husticia mr. Andin Bikker ta sumamente contento di por a haya e bon noticia awe diasabra mainta for di Directora di Guarda nos Costa cu a detene e damanan cu pa varios dia tabata ser busca pa nan deportacion despues cu nan peticion pa asilo a keda nenga. Minister ta gradici Directora di Guarda nos Costa y su team como tambe Cuerpo Policial pa nan trabou den captura e damanan aki.
Siguientemente e participacion di Sra. Trudy Hassell directora di Guarda nos Costa cu a anuncia na pueblo di Aruba cu diasabra mainta a detene e dos personanan cu durante un par di siman caba tabata haci mofa y burla di Aruba en general. E burla tambe tabata dirigi na tur Arubiano y tur otro stranhero cu ta bibando legalmente y ta cumpli cu leynan vigente. Sra. Hassell a bisa di ta sumamente orguyoso di tur trahado di Guarda nos Costa y cu ayudo di Cuerpo Policial pa nan trabou pasobra pa varios dia tabata busca e dos damanan aki.
Awe mainta Sra. Hassell a confirma tur dos a keda deteni pa Guarda nos Costa y ta bay pone nan den e proceso di deportacion. Hunto cu e proceso di deportacion ta spera cu despues di peticion cu ta bay haci na Ministro di Husticia cu na momento nan wordo saca di Aruba obligatoriamente, ta bay pone riba e ‘no wanted list’ pa asina garantisa cu nunca mas nan ta bolbe bek pa e pais aki cu tanto a burla di dje. Un pais cu a duna e personanan aki e sosten na momento cu a bin Aruba. Manera ta conoci su peticion pa asilo a wordo nenga y esey ta un proceso legal cu a tuma luga corectamente y na momento cu el a wordo nenga e tabata sa cu e ta ilegal.
Maske cu tabata asina a sigui burla di Aruba su leynan y su hospitalidad. Sra. Hassell a bisa di ta contento di e por anuncia e noticia aki y keda pendiente pa duna mas informacion.
![Guarda Nos Costa Como Tambe Cuerpo Policial Diasabra Mainta Ta Captura E Dos Damanan Venezolano 155 Whatsapp Image 2020 03 14 At 10.48.47 Am](https://www.earubianonews.com/wp-content/uploads/2020/03/WhatsApp-Image-2020-03-14-at-10.48.47-AM-800x600.jpeg)