ORANJESTAD, Aruba
Camara di Comercio y Industria Aruba (KvK) a reuni hunto cu Gobierno y otro gremionan comercial pa discuti riba e siguiente fase di e reforma fiscal. KvK ta haya importante pa informa e comunidad comercial en particular riba kico ta e contenido di esaki pa asina por ta miho prepara y alabes contribui na un reforma mas adecua.
Gobierno di Aruba (GdA) a provee Parlamento di Aruba cu un documento inoficial di e ley cu ta elabora riba e fase 2 di e Reforma Fiscal. Metanan principal di esaki ta pa simplifica e régimen fiscal y asina creando un régimen fiscal sostenible. E siguiente puntonan ta entre otro e proposicionnan cu lo drenta na vigor entrante 1 april 2020:
Proposicionnan:
- Impuesto di 6% na frontera. Esaki lo crea inflacion cu lo tin un impacto negativo riba nos economia. No tin claridad encuanto e aspectonan practico.
- Lo aboli e regimen di IPC (Imputation Payment Company) bieu y nobo. Esaki lo tin efecto negativo pa e sector hotelero y otro actividadnan specifico.
- Perdida di balor (depreciation) ariba propiedad. Esaki lo tin un impacto negativo pasobra mester bay paga mas impuesto riba ganashi di negoshi (winstbelasting), e potencial di e depreciation lo wordo reduci drasticamente.
- Incremento den e “Foreign Exchange Commission” di 1.3% pa 1.9%. Esaki lo crea un impacto negativo como cu e ta ocasiona un efecto di inflacion. Pagonan den exterior lo bira 0.6% mas caro locual lo hiba na expectativanan di un crecemento minimo di e nivel di prijs di 0.6%.
- Ta aboli pensioen den propio cuenta (pensioen in eigenbeheer). Esaki lo elimina e posibilidad pa mantene placa den e compania y re-inverti den e economia y ta forma asina un impacto negativo.
- Por cumpra e provision di pensioen cu a acumula den un propio cuenta na 10% enbes di 25%. Esaki ta un medida positivo, aunke e ta un ingreso di un biaha so pa GdA.
- Un tarifa di dividendo di 10% riba ganashi reteni. Esaki ta un medida positivo, sin embargo, esaki tambe ta un ingreso di un solo biaha pa GdA.
- Ta incrementa e subsidio di inversion di 6% pa 10%. Na un largo plaso esaki ta un medida positivo pa loke ta e clima di inversion.
- Ta baha winstbelasting di 25% pa 23%. Esaki ta ofrece un impacto positivo na e economia na largo plaso.
Consideracionnan
Mirando e circumstancianan actual, KvK ta di opinion cu e puntonan 1 te cu 5 no mester drenta na vigor entrante 1 april 2020. KvK ta conseha cu e medidanan aki mester wordo posponi te cu proximo aviso.
E situacion cu Aruba ta pasando aden, KvK ta di opinion cu puntonan 6 te cu 9 y en particular puntonan 6 y 7 mester wordo optimalisa pa asina por genera mas entrada den e economia di Aruba.
Considerando e situacion actual relaciona cu Corona Virus y e expectativannan di e impacto cu esaki lo por tin pa mundo henter y tambe pa e economia di Aruba, Camara di Comercio representando e comerciantenan ta di opinion cu no lo ta produnte pa ehecuta e proposicionnan menciona anteriormente entrante 1 april 2020 y ta recomenda pa pospone e introduccion di esaki te un proximo aviso.
