ORANJESTAD, Aruba
Parlamentario Alan Howell a comenta riba e situacion di hulpbestuurskantoor San Nicolas, unda recientemente e trahadornan a walk-out debi na e situacion di e edificio.
El a bisa cu e personal di hulpbestuurskantoor a dicidi di walk-out pasobra nan ta sinti cu ta basta, cu nan salud ta den peliger mirando e schimmels cu tin y cu ta afectando nan curpa. “Ami, Alan Howell ta para 100% tras di e trahadornan aki, pasobra ningun hende lo kier traha den un ambiente cu ta trece bo salud na peliger. Tur hende sa cu ora ta trata di San Nicolas, bo ta hacimi un tiki extra dolor”.
E parlamentario di POR a indica tambe cu ora el a haya sa di e situacion, el a tuma contacto di biaha cu Prome Minister. E ta gradici Premier Wever-Croes pa dune e contesta y trankilidad cu e e trahadornan no ta den e edificio ey mas y cu ta buscando un solucion a corto plaso pa sigui cu e servicio cu hulpbestuurskantoor San Nicolas ta brinda.
Riba esaki e ta expresa enfaticamente cu e no ta desea pa e servicio aki bay otro caminda cu no ta San Nicolas y pesey e ta haci e yamado y peticion na Prome Minister y Minister di Infrastructura pa busca un edificio na San Nicolas caminda cu e operacion di hulpbestuurskantoor por sigui draai normal sin cu pueblo di pariba di brug, di San Nicolas mester sali perhudica.
![Alan Howell Ta Para 100% Tras Di Trahadornan Di Hulpbestuurskantoor San Nicolas Mester Haya Un Edificio Na San Nicolas Mes Pa Sigui Brinda E Servicio 155 Alanpc](https://www.earubianonews.com/wp-content/uploads/2020/03/AlanPC-800x535.jpg)