ORANJESTAD,Aruba
Un delegacion di fraccion di AVP a reuni cu Banco Central diaranson mainta riba e
pronosticonan economico pa e añanan nos dilanti na vispera di introduccion di e di dos fase di e
reforma fiscal cu Raad van Advies a categorisa como un acumulacion mas di impuesto. “Ya caba
nos por a mira con den 2018 y 2019 gobierno a ranca 270 miyon for di nos economia na
medidanan introduci bou capa di un ‘reforma fiscal’ y e aña aki gobierno lo bay randa 140 miyon
mas.
Comercio, empresanan mediano y chikito, trahadornan independiente y tur consumidor lo wordo
afecta gravemente cu introduccion di un BBO nobo di 6% na frontera den combinacion cu
aumento di deviezenprovisie. E medida aki ta mishi esun cu mester bay importa cualkier ekipo of
instrumento cu e tin mester pa bay haci su trabou, ta pone cu su gastonan di operacion ta bira
mas halto y lo afecta e pueblo consumidor finalmente.
Gobierno tin intencion di limita deduccionnan di winstbelasting cu ta haci inversionnan na Aruba
atractivo. Tambe ta elimina e regimen fiscal IPC, cu ta un regimen cu no ta solamente ta
atractivo pa hotelnan pero pa tur empresanan cu kier bin inverti den turismo medido, den
inovacion, den sostenibilidad y economia di conocemento.
Mucho otro incentivonan fiscal no ta keda y obviamente tur esakinan tin un efecto riba economia
aworaki y den futuro, como tambe e clima di inversion di Aruba. Esaki ta algo cu Raad van
Advies tambe a trece dilanti den nan conseho na Gobierno.
Raad van Advies tabata hopi enfatico bisando cu introduccion di medida no ta e unico manera,
pa yega na e norma. Sigurmanete reduccion di gasto ta clave pa logra esaki, pero no tabata tin
ningun intencion genuino di gobierno hasi esaki.
E medidanan cu gobierno a bin ta tuma tin un efecto riba termino cortico, pero despues di algun
aña gobierno tin un problema serio, ya cu esaki ta bay tin un efecto hopi grandi riba economia y
finansa publico.
E 140 miyon extra cu gobierno ta haya cu introduccion di e reforma fiscal, ta 140 miyon menos
tin cu ta draai den nos economia. Esaki ta algo ta hopi preocupante y fraccion di AVP a trece
esaki na conocemento di Banco Central.
Gobierno no a studia e efecto economico di e medidanan aki. Riba dj’e gobierno no a bin cu
ningun incentivo. Na momento cu Raad van Advies a trece dilanti su preocupacion riba con
Gobierno lo contra-aresta e efecto negativo riba nos clima di inversion, poder di compra,
competitividad, inversionan, turismo – mirando e factornan externo manera e coronavirus cu ta
bay tin efecto riba nos turismo y ya caba varios instancia y stakeholders a alerta riba esaki —
gobierno simplemente a constesta cu e efectonan lo ta minimo pasobra ‘nos por papia cuater
idioma, nos tin un bon infrastructura y nos tin un bon cuido medico’.
Segun Arends, e contesta di Gobierno falta tur seriedad. E factornan aki ta inherente na nos
sociedad y no ta forma parti di un maneho economico. E factornan aki no ta bay mitiga e efecto
di 270 miyon cu a wordo ranca di economia den e periodo 2018-2019, ni tampoco e 140 miyon
pa e aña aki,” Parlamentario Richard Arends a mustra na salida di e reunion cu Banco Central.
