ORANJESTAD,Aruba
No ta conoci e motibo exacto pero pa mas cu un aña caba no ta manda haci testnan necesario mesora na Instituto Forensico di Hulanda mas. Consecuencia di esaki, manera a sosode diabierna ultimo, mester a laga un preso liber te ora cu tin e resultado pa e caso sigui.
Paul Merveille di 38 aña ta acusa di a viola un mucha muhe dia 24 di april, 2019. Diabierna un biaha mas su caso a bini dilanti mesa berde. Fiscal di Ministerio Publico cu un cara yen di berguensa mester a pidi Corte pa pospone tratamento di e caso pa tempo indefini.
Segun el a splica Corte varios biaha caba e homber aki acusa di violacion sexual mester a presenta dilanti mesa berde. E tin 317 dia cera. “Den un situacion asina, nos mester pone den balansa interes di e acusado pa un huicio husto di un banda y e interes di e comunidad di otro banda.” Den e caso aki, fiscal a sigui splica, e homber tin mas cu 300 dia cera y ainda su caso no por wordo trata den Corte. E ta nenga di comete e hecho mientras cu di otro banda tin un denuncia haci. No tin otro prueba pa cual a dicidi di laga haci un DNA test cu e acusado a coopera cun’e.
Segun e representante di OM a splica, esaki no ta prome caso sino di tres cu nan mester a pospone of laga e acusado bay en espera di resultado di test di DNA.
Na Aruba no tin e facilidad pa tipo di testnan asina y ta manda nan tur pa Nederlands Forensisch Instituut (NFI). AE maneho di OM ta cu no ta manda haci test cada bes cu tin un caso. Ta spera ora cu tin cierto cantidad, y ta manda tur hunto. Asina por ehempel luna pasa mes nan a pospone tratamento di un caso di posesion di arma di candela, pa motibo cu mester a laga haci test riba e arma di candela y a mande den luna di februari cu tur e grupo grandi di test cu a manda pa NFI. Pues esun di e acusado aki a bay hunto cu e ultimo set manda.
Manera ta conoci, e tipo di testnan aki tambe ta tarda un poco pa haya resultado, ya cu NFI ta haci e testnan aki pa henter Hulanda y e islanan Caribense tambe.
Mirando cu no tin fecha ainda pa haya e resultado y e homber aki tin casi un aña cera sin cu por trata su caso, cu ta en contra di derechonan humano, a dicidi di pidi Corte pa lague liber y pospone tratamento di e caso pa fecha indefini.
Hues despues di a repasa e PV y puntra pakico ta tarda asina hopi y di con no ta manda un pa un, a dicidi pa laga e acusado den libertad temporal. A pone si e condicion cu e no mag tuma contacto cu e denunciante of su famia y ni yega cerca di nan.
Na momento cu e resultadonan yega Aruba, ta bay pone un fecha nobo pa tratamento di e caso.
![A Laga Acusado Liber Door Cu No Ta Haci Test Di Dna Sino Te Ora Cu Tin Un Grupo Grandi 155 56835674 10162123191730001 8818779400242724864 N](https://www.earubianonews.com/wp-content/uploads/2020/03/56835674_10162123191730001_8818779400242724864_n-800x398.jpg)