ORANJESTAD,Aruba
“Fraccion di AVP ta sumamente preocupa pa efecto di e medidanan den presupuesto 2020 pa
perspectivanan di crecemento economico,” segun Parlamentario Sr Richard Arends ayera mainta
para dilanti di Banco Central vociferando e preocupacion y incertidumbre grandi aki.
Den e periodo 2013 pa 2017, Aruba a conoce un crecemento economico solido danki na un
maneho di inversion robusto hiba pa gabinete Mike Eman. “Perspectivanan pa crecemento
economico ta wordo frena na e momento aki pa e aumento di impuesto cu nos ta conociendo for
di 2018.”
Presupuesto pa aña 2020 ta yega su norma di surplus di +0.5% a base di medida. “Tur
expectativa pa un crecemento economico, con conservativo cu esakinan lo por ta, ta bira hopi
pero hopi chikito,” Sr. Arends a splica. Un presupuesto cu un formato diferente, caminda
derecho di Parlamento ta wordo mina un biaha mas. “Parlamento lo aproba solamente e gastonan
total na nivel di ministerio y ta duna e minister carta blanco pa reparti e fondonan manera cu e ta
haña ta bon dentro di su ministerio,” sr Arends a mustra. “E desaroyo aki sigur ta algo
sumamente cuestionabel y a trece esakinan dilanti den e reunionnan preparativo. Sinembargo nos
por a constata cu no a duna oido na a preocupacionnan di miembronan di Parlamento.”
“Ta trata aki di un prespuesto incompleto, como cu gran parti di e entradanan prespuesta no tin
base legal ainda, mirando cu e leynan cu ta formalisa e reforma fiscal no a yega Parlamento
ainda.” No obstante esaki Parlamento a haña solamente un siman di tempo pa hasi pregunta por
escrito mientras cu e presupuesto ta 6 luna laat.
Gobierno a anuncia cu e prepuesto aki ta den liña cu palabracionan cu CAFT y pa kita cualkier
intervencion for di Conseho di Minister di Reino. “Esaki ta un punto di salida completamente
robes caminda cu ta aumenta impuesto riba lomba di ciudadano, comercio y nos unico pilar
economico pa asina cumpli cu palabracionan cu Gobierno riba su mes. Manera cu CAFT a indica
caba den su prome reaccion: gobierno ta yega e normanan stipula, unicamente door di e
medidanan nobo cu lo wordo implementa y mustrando tambe cu no tin un reduccion genuino di
gastonan,” segun declaracion di Parlamentario Richard Arends.
![Ponencia Di Caft Confirma: Presupuesto 2020 Yen Di Medida 155 Img 9903](https://www.earubianonews.com/wp-content/uploads/2020/03/IMG_9903-800x560.jpg)