KRALENDIJK, Bonaire
Boneiru i Kòrsou ta bai traha mas estrecho ku otro. Pa logra esei awe na Willemstad diputado Elvis Tjin Asjoe na nòmber di Entidat Públiko Boneiru i minister presidente Eugene Rhuggenaath na nòmber di gobièrnu di Kòrsou a firma un Akuerdo di Hermandat.
Den e akuerdo di hermandat: ,,Ta un deseo konhunto pa a base di igualdat i konfiansa mutuo ratifiká e lasonan fraternal di siglonan bieu entre e pueblonan di Kòrsou i Boneiru.”
Te na e reformashon estatal di 2010 Boneiru i Kòrsou komo teritorionan insular pa medio di lei i regulashon tabata estrechamente konektá ku otro den un solo pais i riba vários tereno opviamente tabata eksistí koperashon. Ora ku a disolvé pais Antia Hulandes mayoria di e palabrashonnan eksistente a kanselá outomátikamente. E echo ku durante e promé añanan despues di 2010 riba ámbos isla tabatin kestion di instabilidat gubernamental ta un di e motibunan ku no a logra hasi palabrashonnan nobo di koperashon. Entretantu e lasonan familiar, kultural i komersial di siglonan bieu entre e pueblonan a keda igualmente fuerte. Desde ku e aktual Kolegio Ehekutivo a tuma asiento diputado Tjin Asjoe a hasi esfuerso pa hasi e lasonan gubernamental ku Kòrsou mas fuerte. E esfuersonan aki a kai den bon tera serka minister presidente Rhuggenaath.
Diputado Tjin Asjoe: ,,Pa motibu di e eskala chikitu di Kòrsou i Boneiru nos tin un kantidat grandi di desafio komun di desaroyo. Nos por saka hopi bentaha si nos kompartí konosementu i eksperensia ku otro i traha huntu riba e terenonan ku ta bini na remarke pa esei.”
Minister presidente Rhuggenaath: ,,Nos ta sinti nos mes konektá ku otro. Kompartiendo nos konosementu i eksperensia ku otro ta nifiká ku nos kada unu riba su mes no tin mester di inventá wil di nobo. Riba sierto terenonan nos ta un tiki mas leu, riba otro terenonan Boneiru ta bai nos dilanti. Nos por nifiká hopi pa otro.”
E akuerdo ku nan a firma ta menshoná ehèmpel di terenonan kaminda koperashon por ta bentahoso pa tur dos isla, manera promoshon di komèrsio i industria, entre otro pa medio di investigá posibilidatnan pa transportá merkansia liber di impuesto i liber di derecho di importashon entre e islanan, investigá e posibilidatnan pa mehorá konektividat pa medio di transporte aéreo i via laman pa loke ta trata frekuensia, konfiabilidat i kontra tarifanan mas pagabel, investigá e posibilidatnan pa promové turismo sostenibel i fortifiká e posishon di merkado di e islanan, promové interkambio di konosementu entre funshonarionan di enseñansa dentro di e gobièrnunan i entre representantenan di institutonan di enseñansa i konosementu, preservashon di patrimonio kultural intangibel i tangibel pa medio di stimulashon di interkambio i formashon kultural i artístiko, promové koperashon riba tereno di prevenshon i estilo di bida salú, kuido di salú, formashon di profeshonalnan den kuido i interkambio di informashon i optimalisashon di organisashonnan di gobièrnu pa medio di interkambio di konosementu.
Minister presidente Rhuggenaath i diputado Tjin Asjoe a palabrá pa durante e lunanan binidero kaba elaborá mas aleu e posibilidatnan di koperashon menshoná den e akuerdo di hermandat.
Riba e potrèt por mira kon minister presidente Eugene Rhuggenaath i diputado Elvis Tjin Asjoe ta firma e akuerdo.
