ORANJESTAD, Aruba
Departamento di Cultura Aruba bou auspicio di Ministerio di Cultura hunto cu Cas di Cultura ta apoya e exposicion di e fotografo Hulandes renombra sr. Kees Tabak.
Un exposicion titula ‘Love Multiculture Aruba’ basa riba potretnan preto y blanco cu un refleho di multiculturalismo. Un trabou cu a haci durante 2019 na Aruba caminda sr. Kees Tabak a saca un serie di 50 potret intrigando retrato dobel pa hendenan cu ta stima otro como un solo amor, famia of miho amigonan.
Kees Tabak
Kees Tabak ta un fotografo di retrato conoci pa su icono potretnan preto y blanco di algun di nos Pop Star grandinan cu a haci su carera crece cu pasonan grandi.
Mientras ainda na scol di arte el a cuminsa su carera como un fotografo di punk na un tempel di rock Paradiso y ‘The Melkweg’ na Amsterdam. Su carera a crece cu pasonan grandi, pasobra el a desaroya su propio estilo, y mesora su potretnan a bay rond mundo, manera su potretnan di Prince, Madonna den su studio na Amsterdam, ‘Motorhead’, ‘Captain Beefheart’, Lou Reed, Brain Ferry, pero tambe, ‘The Cramps’ Ramones, Elton John, Frank Zappa, ‘Golden Earring’ y hopi otro mas.
El a sigui haci potretnan en bibo, pero gradualmente a cambia pa potretnan di studio y un diversidad di musiconan di rock artistanan Hulandes y ‘Celebridadnan’.
Un coleccion di su trabou mas famoso ta documenta den su bukinan ‘No More Hero’s’ y ‘Dutch Music’. Kees ta activo ainda como fotografo, awendia e ta mas ocupa como un excelente sacado di potret haciendo mas proyectonan artistico.
E exposicion aki ‘Love Multicultural Aruba’ ta su ultimo proyecto, 50 potretnan di parehanan multicultural na Aruba, caminda el a biba fo’i 2018.
E apertura di su exposicion ‘Love Multicultural Aruba’ a tuma luga diahuebs 27 di februari 2020 pa 7or pm den Sala di Exposicion Unoca na Cas di Cultura. Hopi ta esnan cu a presencia e apertura y admira e bunita potretnan den blanco y preto den e exposicion aki.
Diabierna 6 di maart lo tin un charla tocante fotografia duna pa Kees Tabak cu lo cuminsa pa 7or pm den mesun sala na Cas di Cultura. Entrada ta gratis y esaki ta pa tur fotografo professional, amateur y amantenan di fotografia.
Departamento di Cultura Aruba bou auspicio di Ministerio di Cultura hunto cu Cas di Cultura ta gradici tur esnan cu a participa y ta forma parti di e coleccion di potret den e exposicion ‘Love Multiculture Aruba 2020’. Na mes momento ta felicita sr. Kees Tabak pa su bunita trabou realisa.
Tambe ta participa y invita henter e pueblo di Aruba, fotografonan y tambe amante di fotografia pa bin presencia y admira e bunita trabou artistico aki di Kees cu lo keda exponi di dia 28 di februari te cu 27 di maart venidero. Por bishita esaki durante siman di 9or am – 4or pm y/of durante cualkier evento cu lo ser presenta den Cas di Cultura.
Alabes ta invita pa e charla di diabierna 6 di maart venidero den sala di expo Unoca na Cas di Cultura.
![Exposicion Di Potret Titula ‘Love Multiculture Aruba 2020’ 155 Famia Riba Potret Byn Y Parlamentaria Darlaine Erasmus](https://www.earubianonews.com/wp-content/uploads/2020/03/famia-riba-potret-ByN-y-Parlamentaria-Darlaine-Erasmus-800x534.jpg)
![Exposicion Di Potret Titula ‘Love Multiculture Aruba 2020’ 156 Fotografo J Farro Y Roly Sint Jago](https://www.earubianonews.com/wp-content/uploads/2020/03/fotografo-J-Farro-y-Roly-Sint-Jago-800x534.jpg)
![Exposicion Di Potret Titula ‘Love Multiculture Aruba 2020’ 157 Kees Tabak](https://www.earubianonews.com/wp-content/uploads/2020/03/Kees-Tabak-800x534.jpg)
![Exposicion Di Potret Titula ‘Love Multiculture Aruba 2020’ 158 Participantenan Riba Potret](https://www.earubianonews.com/wp-content/uploads/2020/03/Participantenan-riba-Potret-800x534.jpg)
![Exposicion Di Potret Titula ‘Love Multiculture Aruba 2020’ 159 Publico Y Bunita Bista Di Expo](https://www.earubianonews.com/wp-content/uploads/2020/03/Publico-y-bunita-bista-di-Expo-800x534.jpg)