ORANJESTAD, Aruba
Na momento cu un mucha siña tocante Derecho di Mucha, e ta siña cu e tin Derecho. Tambe e ta siña cu otro persona tambe tin derecho, y cu esaki tin cu ser respeta. Educacion tocante derecho di mucha ta siña e mucha tambe cu e tin derecho di para pa sumes contra esanan cu lo por tin un mal intencion cune.
Pa di dos biaha Fundacion Telefon pa Hubentud Aruba ta ser acerca pa Unicef Hulanda pa asina aki organisa pa Unicef Hulanda e Unicef Kinderrechten Filmfestival aki na Aruba. Na 2018 ya caba Fundacion Telefon pa Hubentud Aruba a organisa e Unicef Kinderrechten Filmfestival na Aruba. E Unicef Kinderrechten Filmfestival aki ta ser organisa tambe na e islanan Bonaire, Curacao, Saba, Sint Eustatius y Sint Maarten. E obhetivo di Unicef Kinderrechten Filmfestival ta pa e muchanan siña conoce nan derechonan y siña expresa esaki na un bon manera.
Unicef Kinderrechten Filmfestival ta consisti di diferente parti. Primeramente docentenan di klasnan 4, 5 y 6 di cinco scol basico a ricibi un training tocante e materia di derecho di mucha. E scolnan cu ta participa na e Unicef Kinderrechten Filmfestival 2020 ta: Cacique Macuarima School, Colegio Filomena, International School of Aruba, Reina Beatrix School y Scol Paso pa Futuro. E training a ser duna ariba 1 di februari ultimo na Universidad di Aruba pa Tamara Salsbach kende ta e persona cu ta duna training pa Unicef Hulanda den Caribe Hulandes.
Despues di e training e docentenan a regresa scol y duna e alumnonan di nan klas les tocante derecho di mucha. Atraves di diferente ejercicio e alumnonan a siña tocante nan derecho. Despues cu e alumnonan a ricibi e lesnan tocante nan derecho, nan a traha un pintura tocante un di e derechonan. Esaki por ta e derecho cu nan gusta mas, e derecho cu pa nan ta mas importante of esun cu nan tin mas pregunta tocante di dje.
Awor cu e pinturanan ta cla, un exposicion lo ser organisa na e scolnan. Durante e exposicion lo saca un ganador di cada klas, pa despues saca un ganador di cada scol. Un ‘filmcoach’, e cabesante di e scol y personal di Fundacion Telefon pa Hubentud Aruba lo fungi como hurado pa saca ganador di cada scol. Na momento cu cada scol tin un ganador, e ‘filmcoach’ lo bishita e scol y hunto cu e alumnonan di e klas di e pintura ganador lo traha un ‘script’ y basa ariba e ‘script’ aki lo traha un pelicula. E base di e ‘script’ y e pelicula ta e pintura ganador. E alumnonan di e klas di e pintura ganador lo ta e actornan den e pelicula. E ‘filmcoachnan’ cu lo ta participando na e Unicef Kinderrechten Filmfestival 2020 ta: Juan David Villar Steffens, Juan Francisco Pardo, Armando Goedgedrag, Efraim Odor y Paula Nahr.
Ariba 29 di april benidero tur cinco pelicula lo ser estrena durante un atardi di ‘première’. Durante e atardi aki tur e muchanan di e klasnan ganador lo ta presente. Tur e peliculanan lo wordo presenta y na final lo kies un pelicula ganador. E pelicula ganador aki hunto cu tur e alumnonan di e klas ganador lo participa na e Unicef Kinderrechten Filmfestival regional cu lo tuma lugar na Bonaire di 12 te cu 14 di juni 2020. Na Bonaire nan lo representa Aruba y lo competi cu e alumnonan di scolnan di Bonaire, Curacao, Sint Maarten, Saba y Sint Eustatius.
Pa mas informacion tocante Unicef Kinderrechtenfilmfestival 2020 por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: telhubentud@gmail.com of telefon 5886138.
![Fundacion Telefon Pa Hubentud Aruba Unbiaha Mas Ta Organisa Unicef Kinderrechten Filmfestival Pa Unicef Hulanda 155 Training Kinderrechten](https://www.earubianonews.com/wp-content/uploads/2020/02/Training-Kinderrechten-800x600.jpg)
![Fundacion Telefon Pa Hubentud Aruba Unbiaha Mas Ta Organisa Unicef Kinderrechten Filmfestival Pa Unicef Hulanda 156 Child Rights Film Festival 2020](https://www.earubianonews.com/wp-content/uploads/2020/02/Child-Rights-Film-Festival-2020-800x307.jpg)