ORANJESTAD, Aruba
Temporada di carnaval a pasa bay pero e caravana carnavalesco di gabinete Wever Croes ta sigui su curso caminda diamars un dia despues cu pueblo a kima Rey Momo, e Reina di Mentira Evelyn Wever Croes a bin kima pueblo otro pakete di medida.
Lider di fraccion di AVP, sr Marlon Sneek a mustra cu den un estilo hopi ‘amoroso’ mes, Minister Presidente Wever Croes den un conferencia di prensa a trata di hustifica na pueblo un biaha mas, cu tin mas medida na caminda.
“Segun Prome Minister, no ta nada nobo ya cu varios leynan cu mester a drenta na vigor aña pasa, awor lo drenta na vigor y den un forma hopi chistoso.
Manera semper Evelyn a purba di convence pueblo cu ya caba su gobierno a duna pueblo asina hopi cu reduccion riba varios belasting, reduccion riba belasting di tereno y otro reduccionnan.
Siembargo loke e Reina di Promesa Falso aki no ta bisa pueblo ta e hecho cu di un banda su gobierno a yuda pueblo cu 16 miyon florin pero di otro banda a ranca mas cu 250 miyon florin for di pueblo.
Ta un hende cu tin hopi curashi, un Prome Minister cu ta sigui insisti pa tuma pueblo pa spectakel, ta sigui cu e tipo di politica barata aki cu no ta sirbi interes di pueblo.
Pa colmo ta bon pa mustra aki, cu mientras cu ainda Parlamento no a ricibi presupuesto 2020, ya caba Prome Minister a bin dilanti y confirma loke nos a bin ta bisando y loke CFT tambe a confirma caba, esta cu tin un serie di medida pa bin.
Awor ta for di boca di e propio Minister Presidente pueblo a haya sa cu lo tin e ley di deviezenprovisie, e ley di BBO na frontera y otro tipo di impuestonan cu lo drenta na vigor dentro di algun siman.
Realmente impresionante pa scucha Evelyn den un forma asina lief trata di convence pueblo cu BBO na frontera ta pa crea un ‘level playingfield’ pa negoshinan den centro di Oranjestad, mientras cu desde su gobierno a huramente, nunca mas ningun di su Ministernan a cana un solo dia den centro pa haya sa realmente kico ta pasando y kico por wordo haci.
Awor di repiente Prome Minister no ta papia di mega debe of di proyectonan PPP mas pero awor ta papia di e “buraco financiero’ cu su gobierno tin cu tapa y pa cual motibo su gobierno ta bay introduci mas medida pa haya placa pa tapa e buraco aki.
Ta bon pueblo realisa aki cu esaki ta mesun lider di MEP cu durante di campaña electoral a drenta casnan rond Aruba, presentando su solucionnan pa e situacion financiero, cu su gobierno lo bay tin e formula pa drecha finansa di gobierno SIN cu mester tuma medida contra pueblo.
Dos luna den gobernacion, su gobierno a suta pueblo cu aumento di BBO y awor pa di tres presupuesto cu Gabinete Wever Croes ta bay manda Parlamento, ta yena cu e di tres serie di medida cu lo ranca miyones atrobe for di cartera di pueblo.
Anto cu tur e presion aki cu gobierno ta sigui pone riba ciudadanonan di nos pais, Evelyn ta spera cu pueblo tin comprension pero con esaki por ta posibel si cu den e presupuesto di 2020, lo no tin ningun beneficio of alivio pa pueblo.
Balor di salario minimo lo sigui disminui ya cu e auemento priminti a base di loke Minister Glenbert Croes a yega di bisa den su tempo den oposicion, nunca a wordo ahusta e e vision aki di su persona.
Pueblo diamars mainta despues di e celebra, a haya e noticia desagradabel cu ta un hecho cu mas medida ta na caminda y pa prome biaha den mas di dos aña den gobierno, Prome Minister Evelyn Wever Croes tabata honesto cu pueblo bisando: ‘ mas medida ta na caminda,’ Parlamentario Marlon Sneek a declara.
![Lider Di Fraccion: Marlon Sneek Prome Minister A Confirma Na Pueblo Cu Mas Medida Ta Dilanti Porta 155 Avp Marlon](https://www.earubianonews.com/wp-content/uploads/2020/02/AVP-Marlon-800x533.jpg)