KRALENDIJK, Bonaire
Entidat Públiko Boneiru a brinda profeshonalnan médiko un entrenamentu tokante violensia doméstiko i maltrato di mucha. E entrenamentu a tuma lugá dia 20 di febrüari i tabatin komo tópiko entre otro privasidat, sekreto profeshonal, kompartí informashon kuidadosamente i mèldumentu di violensia doméstiko i maltrato di mucha.
Islanan BES no konosé leinan spesial pa atendementu ku violensia doméstiko i maltrato di mucha. Por ehèmpel e derecho pa mèldu aunke no tin pèrmit di esun enbolbí òf di su mayornan no ta konosí na islanan BES. Pa e motibu aki e diferente dunadónan di ayudo mester kumpli ku un plan den etapa, promé ku nan por mèldu violensia doméstiko òf maltrato di mucha. Pa hasi esaki nan tin mester di pèrmit di nan kliente. Den kasonan ekstremo dunadónan di ayudo por mèldu violensia doméstiko òf maltrato di mucha sin pèrmit di nan kliente.
E entrenamentu ta forma parti di un plan grandi pa atendementu ku violensia doméstiko i maltrato di mucha. A inkluí e atendementu aki den e Akuerdo di Gobernashon. Den e akuerdo ta menshoná kuater punto di atenshon. Sòru pa bini un sistema pa mèldu kasonan di violensia doméstiko i maltrato di mucha. Ofresé entrenamentu na dunadónan di ayudo pa engrandesé nan ekspertisio. Sòru pa bini mas posibilidat pa akohida di víktima i duna informashon pa prevení kasonan di violensia doméstiko i maltrato di mucha.
E entrenadónan Ingrid Sealy i Desiree Frans ta duna e entrenamentu ku Entidat Públiko Boneiru ta ofresé. Tur luna tin un otro grupo di profeshonal ta partisipá na e entrenamentu. Riba e potrèt por mira e partisipantenan na e entrenamentu i e entrenadónan. (Foto OLB)
