ORANJESTAD, Aruba
Durante conferencia di prensa di fraccion di AVP, Parlamentario drs. Mervin Wyatt-Ras a trece padilanti cu e asunto di Coronavirus ta alarmante. Ya caba tin 82.000 caso di cual 2800 persona a fayece. E malesa aki a inicia na Wuhan- China y a sigui pa otro continente y paisnan manera entre otro Japon, Taiwan, Vietnam, Canada, Estados Unidos, Algeria, 18 pais Europeo, manera Grecia, Alemania, Finlandia, Suecia, Austria, Italia, Spanja. Ademas tambe na Brazil. Ta importante cu nos como pais chikito y turistico ta bon prepara pa proteha nos ciudadanonan y tambe nos forma di ingreso principal cu ta turismo. Por a skucha den diferente declaracion di DVG y minister di Salud den cual e minister ta trece padilanti cu nos ta bon prepara cu tin diferente accion cu a tuma lugar y cu tin cooperacion tambe den Reino. Segun e tratado di IHR ta traha hunto. Alavez tin cooperacion cu PAHO, RIVM di Hulanda y WHO. Sinembargo segun Wyatt-Ras ta importante cu na frontera ta tuma accion. Wyatt-Ras ya caba a haci pregunta na minister y a haya contesta e biaha aki si pa loke ta trata e virus, sinembargo nos pueblo tin mas pregunta cu mester ser contesta. Nos ciudadanonan ta sinti cu nos no ta suficiente prepara. Ademas pa Wyatt-Ras e ta vago ainda. Mientrastanto RIVM di Hulanda a raporta un caso na Tilburg unda e persona ta den cuarentena. Segun Wyatt-Ras esnan cu ta traha cu security y imigracion ta e promer front cu ta topa cu pasaheronan. Nan ta esnan cu ta enfrenta e malesa si e yega Aruba tanto via avion como via cruise ship. Kico ta wordo haci pa nan? Nan a sigui un curso? Cuanto persona a participa na e curso? Den cual departamento nan ta traha? Y kico a sali afo? Pa esnan cu ta traha como werkster y ta haci avionnan limpi ta importante pa sa si tabatin curso pa nan. Kico nan lo haci si den un avion cu a yega un persona infecta? Ki tipo di material nan tin pa asina por traha proteha? Nan ta vulnerabel pa ser contagia. Nan por ta e promer touch tambe cu e posible malesa. Den pueblo ta biba e preocupacion akinan cu a ser vocifera tambe den medionan di comunicacion. Por a tuma nota cu un persona a trece su preocupacion padilanti tocante un avion cu lo a baha y supuestamente lo tabatin 5 persona infecta, pero a resulta cu no tabata asina. Pies tabata un alarma falso. Pero e personanan cu mester a bai haci e avion limpi y di security no lo ta hayando sosten di nan dunadornan di trabou pa proteha nan mes. Nan mes mester a uza plastic pa proteha nan mes, segun e ciudadano a expresa. E ora gobierno tin cu ta alerto y informa y si ta necesario sostene na frontera na un forma mas dirigi pa preveni lo peor, segun Wyatt-Ras. Si companianan no por supply e material necesario lo mester busca otro formanan pa yuda y ofrese material necesario, sikiera un mask. Ora senjala cu un persona cu drenta Aruba por tin e virus ki stap lo tuma? Tin’e riba papel stapsgewijs paso te ainda no a mira esaki por escrito. Si tin un of mas persona contagia den avion kico lo bai pasa cu e otro pasaheronan? Unda nan lo bai? Unda ta e promer cuarentena? Tin cuarentena na Airport y unda mas tin cuarentena? Kico precies Hospital/Imsan/dokternan di cas lo haci pa ricibi un pashent contagia? Nan ta ser proteha? Cuanto lugar di cuarentena tin u pa cuanto persona? Den caso tabatin un persona infecta, tur hende den avion lo bai den cuarentena y pa cuanto tempo? Esakinan ta varios pregunta di nos pueblo cu lo manda pa minister. En bista cu e virus ya caba a yega na Brazil y Hulanda nos tur sa cu ta ricibi hopi vuelo di e paisnan aki. Ki ATA ta conseha? Tur esakinan ta preguntanan cu lo mester ser contesta. Wyatt-Ras ta spera cu lo bin mas claridad pa nos pueblo por haya contesta ariba preguntanan u ta mecsario cu minister ta bin Parlamento pa duna informacion mas comcreto.
![Parlamentario Mervin Wyatt-Ras: Preocupacion Pa Accionnan Na Frontera Pa Loke Ta Trata Coronavirus 155 Mervin Wyatt Ras](https://www.earubianonews.com/wp-content/uploads/2020/02/Mervin-Wyatt-Ras.jpg)