KRALENDIJK, Bonaire
Caribbean Public Health Agency – Carpha (e agensia di salú públiko den Karibe) awor aki ta kalkulá ku e chèns ku e vírùs di korona ta aparesé den region karibense, i por lo tantu na Boneiru tambe, ta mas grandi. Esaki pasobra e kantidat di pais ku ta mèldu pashèntnan kontagiá ta oumentando mas i mas. Na momentu ku ta skirbiendo e komunikado aki a detektá dos kaso di vírùs di korona na Hulanda. No ta asina si ku e vírùs a plama rònt Hulanda i pa e motibu ei Hulanda no ta kai bou di un área di riesgo pa loke ta trata e vírùs di korona.
E malesa COVID-19 (Corona Virus Disease) a ekstendé su mes pa vários pais i kontinente. E vírùs di korona ta plama e malesa aki. E vírùs a aparesé pa di promé biaha den e siudat chines Wuhan. Entre tantu a topa ku e vírùs den hopi pais, inkluyendo diferente pais na Oropa. E siman aki nan a mèldu un kaso na Brasil tambe. Den region karibense te ainda no a haña ningun hende ku ta karga e vírùs huntu kuné.
E señalnan mas komun di infekshon ku e vírùs di korona ta kentura, tosamentu i difikultat pa hala rosea. E síntomanan, ku den mayoria kaso ta leve, parse un fèrkout nòrmal. Un persona salú mes por surpasá e malesa. Pa personanan ku un estado di salú vulnerabel i hende grandinan e riesgo riba síntomanan grave ta mas grandi.
Un sospecho di COVID-19 por surgi ora ku e hende enfermo resientemente a biaha pa un área di riesgo òf tabatin kontakto ku un pashènt ku COVID-19. Si un persona ku ta malu no muchu tempu pasá tabata den un área di riesgo òf tabatin kontakto ku un pashènt ku e vírùs di korona COVID-19, e ora ei ta posibel ku e persona ku ta malu ta kontagiá ku e vírùs. Si bo tin karakterístikanan di e malesa, ta solamente pa medio di un tèst di laboratorio bo por sa sigur ku bo ta kontagiá ku e vírùs di korona. Solamente un tèst di laboratorio por hasi e diagnósis ora bo tin síntoma. Si bo tin pregunta tokante esaki, tuma kontakto telefóniko ku bo dòkter di kas òf ku Departamentu di Salubridat Públiko.
Ku bon higiena por prevení ku e malesa ta plama. Importante ta pa regularmente laba man bon ku awa i habon. Ora di tosa i nister tapa bo boka i nanishi ku ploi di bo èlebog i/òf ku lensu di papel desechabel. No mishi ku bo kara ora ku bo mannan no ta limpi. Si bo ta bai biaha, e ora ei riba site di RIVM asuntunan eksterior, Carpha i WHO bo por haña e último informashonnan tokante e áreanan di riesgo di e momentu aki. Den sirkunstansianan general ora ku no tin kontakto ku hendenan ku ta malu, no tin sentido pa bisti protekshon na boka i nanishi (mondkapje). Laba bo mannan bon ku awa i habon i tosa i nister den un lensu di papel desechabel ta e mihó prevenshon.
Departamento di Salubridat Públiko ta traha estrechamente ku Instituto di Reino pa Salubridat Públiko i Medio Ambiente (Rijks Instituut voor Volksgezondheid en Milieu – RIVM) i ku profeshonalnan di kuido di salú i otro organisashonnan importante na Boneiru. Ta trata aki di señalamentu di kasonan di malesa òf pashèntnan sospechoso. Tambe nan ta traha huntu pa mèldu kasonan di malesa i tuma e medidanan korekto. Tin bon palabrashon ku aeropuerto, haf, barkunan krusero, dòkternan di kas i hòspital tokante kon pa aktua ora ku tin un kaso sospechoso. Si presentá un sospecho, mesora ta evaluá e situashon i e protokòlnan ta bira aktivo.
Ku un bon higiena nos por prevení ku e vírùs ta plama, tambe si tòg e vírùs aparesé na Boneiru. Pániko no ta nesesario. Ta importante pa keda paga tinu bon i tuma e medidanan korekto si esei ta nesesario. Si tin desaroyonan nobo importante, departamento di Salubridat Públiko ta tene bo na altura.
![Chèns Pa Vírùs Di Korona Na Boneiru A Bira Mas Grandi 155 Bonaire Coronavirus 1](https://www.earubianonews.com/wp-content/uploads/2020/02/Bonaire-Coronavirus-1-716x600.jpg)
![Chèns Pa Vírùs Di Korona Na Boneiru A Bira Mas Grandi 156 Bonaire Coronavirus 2](https://www.earubianonews.com/wp-content/uploads/2020/02/Bonaire-Coronavirus-2.jpg)