ORANJESTAD, Aruba
Mientras cu asociadonan di La Cabana Beach Resort & Casino a termina nan reunion di prome kwartaal, un brass band a cuminsa zona, señalando e publico pa sigui e musica direccion di e pool deck na unda cu eleccion anual di Reina a tuma luga cu shete candidatonan super emociona, prepara pa conkista e curason di tur esnan cu a atende, y baila cu e corona y sash manera e resort su realeza di aña.
Lisandra Vrolijk, representando Food & Beverage, Paula Zievinger, di Activities, Johana Bakhuis, Owners’ Services, Luna Rodriguez, Human Resources, Claudia Castro, Housekeeping, Kilary Villegas, Front Office, y Tahelis Werleman, Glitz Casino, a introduci nan mes na e huradonan cu discursonan corto y leuk, orguyosamente dorna cu colornan carnavalesco, mientras cu e brassband tabata anima y entretene.
E candidatanan a sigui na ilustra nan actitud briyante carnavalesco por medio di baila cu esnan cu tabata sostene nan hunto cu fanaticonan na e musica di e banda.
Despues di deliberacionnan, e panel di huradonan a eligi Johana Bakhuis di Owners’ Services manera e ganador y asina el a wordo corona den ceremonia, sigui por medio di eleccion di e runner-up, Tahelis Werleman di Glitz Casino.
E tremendo evento aki tabata tin manera host e Social Committee den colaboracion cu departamento di Human Resources, y tambe e Eagle Team. Nan a presenta un bunita sunset party, na unda cu guest y asociadonan por a apoya nan candidata faborito bailando na musica carnavalesco.
Un pabien ta bay na tur candidatanan di reina kende a participa y haci nan best, y tambe un pabien ta bay na Reina Johana, kende a bay cu e titulo grandi, deseando bo pa disfruta bo truinfo manera reina den e Reino di La Cabana, pa 365 dianan alegre.
