ORANJESTAD, Aruba
Entrante 26 di februari Te cu diabierna dia 6 di maart, ilustrador y diseñador grafico, Steffen Maas, ta presenta su proyecto ArubaABC den sala di exposicion na Biblioteca Nacional Aruba. E exposicion ta habri durante orario regular di biblioteca. Apertura oficial ta diahuebs awor di 7or pa 9or di anochi. Publico ta bon bini na biblioteca.
Proyecto ArubABC ta un proyecto educativo cu conoce diferente producto, un di nan ta un buki pa muchanan di scol, titula ‘Mi buki di Aruba’. Un buki pa muchanan entre 4 cu 7 aña cu ta cuminsa siña lesa. Un buki cu imahennan hopi colorido, acompaña cu palabranan na Papiamento. Otro productonan den exposicion ta simbolo di Aruba reconocibel pa tur, weganan, carchi y art prints. Meta tras di e proyecto ta stimula lesamento, conocemento di cultura y concientisacion cultural bou mucha y hoben. E exposicion ta duna un bista di e desaroyo di e proyecto y ta presenta e ‘Mi buki di Aruba’. Ta invita publico pa duna feedback riba e material educativo pa asina Steffen Maas por sigui desaroya esaki. Pa por haya feedback di profesional den enseñansa tin un presentacion special dialuna awor, atardi 4or.
![Presentacion Di Proyecto Arubabc 155 Expo 01](https://earubianonews.com/wp-content/uploads/2020/02/Expo-01-601x600.jpg)
![Presentacion Di Proyecto Arubabc 156 Bio Sm](https://earubianonews.com/wp-content/uploads/2020/02/BIO-SM-424x600.jpg)
![Presentacion Di Proyecto Arubabc 157 Steffen Maas Mi Buki Di Aruba](https://earubianonews.com/wp-content/uploads/2020/02/Steffen-Maas-Mi-buki-di-Aruba-600x600.jpg)