ORANJESTAD, Aruba
Fundacion Bernadina Growell Kock ta recorda tur ciudadano cu diaranzon 26 di februari lo lansa e buki conmemorativo dedica na Mama di Cultura, Bernadina Growell Kock. E evento cultural lo tuma lugar di 7-9 or anochi den Cas di Cultura. Lo tin discurso, canto, declamacion di poesia y sketchan. E buki a ser compila dor di fundacion den cooperacion cu rumannan di Bernadina Growell-Kock d.f.m. Den e buki ta describi ken Bernadina tabata, su cancionnan, carera musical y logronan. Ademas por haya un bista di kennan tabata rond di Mama di Cultura. Bernadina a nace dia 27 di februari 1939 y a fayece dia 23 di februari 2009. El a compone un cantidad di cancion di cual 40 a keda registra. E ta promer hende muher cu a canta y a compone cancion pa festival di tumba. El a compone himmo di Brazil, Himmo di flor di brazil, himno di grupo violeta. El a lanta diferente agrupacion musical manera Las Campiranas, Estrella di Oro, el actua den y dirigi diferente produccion teatral. Un don di Mama di cultura ta cu e por adapta su mes riba escenario na cualkier tipo di edad. E ta un valuarte di nos cultura y ta di importancia pa rindi homenahe na dje. Fundacion hunto cu Chico Harms ta invita tur esnan cu ta stima nos cultura y esnan cu ta participa na paradanan cultural, na festivalnan y na elecionnan di Damanan y damitanan pa acudi na e evento. Na un manera simbolici lo cana hunto drenta Cas di Cultura. Ta invita Un y tur pa ta presente. Entrada lo ta Completamente gratis.
![Diaranzon Dia 26 Di Februari Ta Lansa Buki Conmemorativo Dedica Na Mama Di Cultura 155 Image](https://earubianonews.com/wp-content/uploads/2020/02/image-800x600.jpg)