ORANJESTAD, Aruba
Representantenan di Aruba Convention Bureau (A.C.B.) cu ta forma parti di e ekipo dinamico di Aruba Tourism Authority (A.T.A.) a atende e prestigioso Society for Incentive Travel Excellence (SITE) Global Conference cu a tuma luga na Vancouver, Canada. SITE Global Conference ta internacionalmente conoci como un magno evento caminda profesionalnan den e industria di biahe ta bini hunto pa elabora riba e futuro di loke ta trata e industria di biahe.
Desde aña 1973, SITE ta opera como un asociacion profesional cu ta dedica exclusivamente na e segmento di e industria di biahe conoci como ‘incentive travel’. ‘Incentive travel’ ta encera tur biahe cu ta wordo organisa pa gruponan grandi, entre otro negoshi y companianan, caminda e proposito principal di e biahe ta pa incentiva e trahadornan.
Sinembargo, ‘incentive travel’ ta e segmento di mas grandi den e industria di Meetings, Incentives, Conventions and Events (MICE) cu den su totalidad ta representa un contribucion economico significante pa e industria turistico riba nos isla. Pa e motibo aki e industria di MICE, incluyendo e segmento di ‘incentive travel’, ta uno sumamente lucrativo y importante pa A.T.A. Consecuentemente, A.T.A. a crea loke ta conoci awe como A.C.B., un departamento cu ta enfoca netamente riba e negoshi di MICE. Como parti di e negoshi di MICE, A.C.B. ta asisti y facilita biahenan pa Aruba pa gruponan of companianan cu kier, entre otro, incentiva nan trahadornan.
E tema di e SITE Global Conference pa aña 2020 ta ‘We are limitless’, representando e poder di biahe como e motivacion pa personanan rond di mundo haci uzo di oportunidadnan pa conoce otro personanan, siña cosnan nobo y descubri luganan cu hamas a wordo bishita. A.C.B. a atende e SITE Global Conference pa asina por keda na altura di desaroyonan tumando luga den e industria di biahe, specificamente ‘incentive travel’. Ademas, e conferencia anual aki tambe ta fungi como oportunidad pa miembronan di A.C.B. intercambia ideanan y ‘network’ cu socionan clave den e industria aki. Por a nota tambe cu companianan local ECO DMS y Fofoti Tours & Transfers tabata presente na e conferencia aki.
A.C.B. ta traha continuamente pa asina percura pa Aruba mantene un presencia fuerte den e industria lucrativo di MICE por medio di atende eventonan manera, entre otro, e SITE Global Conference. For di un estudio conduci pa A.T.A. a resulta cu 95.4% di participantenan cu a bishita Aruba como parti di e industria di MICE ta sea satisfecho of sumamente satisfecho cu nan experiencia durante nan bishita riba nos isla. Ademas, un total di 54.5% di participantenan a sigura cu nan lo bolbe bishita Aruba den futuro. Consecuentemente, conferencianan manera e SITE Global Conference ta importante pa miembronan di A.C.B. por colecta informacion valioso y comparti esaki cu miembronan clave den e industria di MICE aki na Aruba pa asina sigi traha pa mehora Aruba su posicion den e industria di MICE riba nivel internacional.
![Aruba Convention Bureau Cu Participacion Exitoso Hopi Interes Pa Cu E Segmento Di ‘Incentive Travel’ Pa Aruba 155 67B70221 E74C 4Bc3 9326 B04Bb1Ef435C](https://www.earubianonews.com/wp-content/uploads/2020/02/67b70221-e74c-4bc3-9326-b04bb1ef435c-450x600.jpg)
![Aruba Convention Bureau Cu Participacion Exitoso Hopi Interes Pa Cu E Segmento Di ‘Incentive Travel’ Pa Aruba 156 Img 9543](https://www.earubianonews.com/wp-content/uploads/2020/02/IMG_9543-450x600.jpg)
![Aruba Convention Bureau Cu Participacion Exitoso Hopi Interes Pa Cu E Segmento Di ‘Incentive Travel’ Pa Aruba 157 Img 9509](https://www.earubianonews.com/wp-content/uploads/2020/02/IMG_9509-800x600.jpg)