ORANJESTAD, Aruba
Fundacion GO Cultura cu hopi satisfaccion y gratitud por wak atras riba un otro proyecto exitoso cu a conta cu sosten magnifico di nos comunidad.
Un proyecto musical cu a wordo presenta riba dia di San Valentino pa beneficia dos causa importante: rescate, restauracion y renobacion di e Teatro di Ser’i Noka y tambe aporta na e esfuerzo di restauracion di cuatro les lokaal di Cacique Macuarima school destrui door di vandalismo y candela.
Cu sosten y participacion di artistanan Edjean Semeleer, Chris Kross, Rocco Franken, Angelo Kock y Christopher Rodulfo, un recital musical excelente a wordo presenta pa deleite di tur esnan presente. Un concierto intimo cu na final a laga tur hende sinti satisfecho cu hunto a logra recauda fondo no solamente pa e Teatro di Ser’i Noka pero tambe e bunita suma di AWG 2,000 pa Cacique Macuarima.
Den presencia di cabesante Sra. Rachelle Croes-Caster y su coleganan, a haci entrega di esaki e anochi ey mes.
Dicon GO Cultura ta considera e causa aki tambe asina importante?
Pasobra educacion ta un derecho humano fundamental y ta e base di desaroyo sostenibel.
E ta stimula creatividad, e ta prepara y genera individuonan util, inspira, empodera, eleva y ta contribui na un sociedad fuerte, mas sigur y stabil. E tin un rol crucial den formacion di identidad personal y colectivo, influenciando y formando asina un cultura rico y diverso. Fundacion GO Cultura lo sigui sostene Cacique Macuarima den futuro y caminda cu ta posibel, tur causa cu ta enrikece nos herencia cultural y brinda educacion excepcional na e futuro civilizacion cu lo lidera nos pais.
Gradicimento special na tur maestro riba nos isla cu ta brinda educacion na tur nos muchanan y hobennan. Danki pa boso empeño y esfuerzo, poniendo e bienestar di nos muchanan na prome lugar. Un gradicimento inmenso tambe na tur hende y empresa pa e apoyo valioso.
