KRALENDIJK, Bonaire
Bou di guia di Gezaghebber e grupo di guia Kombustibel a disidí dia 10 di febrüari 2020 pa implementá medidanan di emergensia pa sigurá suministro di kombustibel na Boneiru. Di e manera aki ta garantisá suministro di awa di bebe i koriente. Un suministro di energia ku ta funshoná bon ta di gran importansia sosial i ekonómiko pa Boneiru.
Na e momentunan aki pa loke ta trata suministro di koriente i awa di bebe Boneiru ta dependiente di Fuel Oil pisá (HFO) ku ta almasená na Bopec. PDVSA, e kompania estatal di petroli di Venezuela ta doño di e petroli aki. Sanshonnan merikano ta prohibí pa hasi negoshi ku i hasi pagonan na PDVSA, a ménos si pidi lisensia pa hasi esaki. Aña pasá Curoil i Contour Global a pidi i haña e lisensianan aki pa por kumpra i paga HFO for di Bopec. E lisensianan aktual ta kaduká dia 31 di mart 2020 i un prolongashon di esakinan no ta sigur. Pa motibu di e insiguridat aki e grupo di guia Kombustibel a disidí pa implementá dos medida di emergensia ku lo sigurá entrega adekuá di koriente i awa di bebe riba término korto.
Na promé lugá a kuminsá ku preparashonnan pa konstruí un fasilidat di transbordo pa HFO riba tereno di BIA ku nan ta konektá ku un pipa di transporte pa bai waf di aeropuerto. Almasenahe di HFO lo tuma lugá den dos ponton ku nan ta mara na e waf. Diariamente lo por transportá e HFO ku trùk pa Contour Global Bonaire.Banda di transbordo i transporte di HFO for di waf di aeropuerto a pidi Curoil pa hasi abastesimentu i almasenahe di disel komo kombustibel pa e planta di elektrisidat posibel. Ku implementashon di e medidanan aki Boneiru lo no ta dependiente mas di almasenahe di kombustibel di PDVSA na Bopec. E medidanan di emergensia aki ta di un karakter temporal i solamente lo hasi uso di nan efektivamente na momentu ku Bopec stòp ku entrega di ‘fuel oil’.
Aktualmente tin konsulta ta tumando lugá ku outoridatnan merikano tokante prolongashon di e lisensianan despues di 31 di mart 2020. Si e lisensianan keda otorgá por lo pronto entrega di HFO for di Bopec lo por kontinuá.
E medidanan di emergensia ta di un karakter temporal. Boneiru, huntu ku e Taskforce Kombustibel bou di presidensia di Ministerio di Infrastruktura i Maneho di Awa, ta trahando riba un solushon struktural kaminda lo konstruí dos terminal di almasenahe nobo na Boneiru.
E Taskforce Kombustibel ta un relashon di koperashon entre Entidat Públiko Boneiru i ministerio di Asuntunan Interno i Relashonnan den Reino, ministerio di Asuntunan Ekonómiko i ministerio di Infrastruktura i Maneho di Awa.
