KRALENDIJK, Bonaire
Mas òf ménos 50 boneriano ku ta biba na Hulanda Oropeo djárason anochi a soportá e wer malu pa partisipá na un seshon den kuadro di Plan Maestro Boneiru 2030 na Den Haag.
Den su introdukshon ku énfasis gezaghebber Edison Rijna a supliká e presentenan, un meskla bunita di hende hóben i ménos hóben, pa usa nan kreatividat pa ekspresá nan mes libramente i tuma e kurashi pa pensa ‘out of the box’. ‘Netamente di boso ku di kurason ta sinti boso mes komprometé ku Boneiru, pero ku for di un distansia ta sigui e desaroyonan riba nos isla, nos ta ferwagt ideanan nobo’, segun gezaghebber Rijna.
E tema di e seshon di Plan Maestro ‘hulandes’ tabata oportunidatnan i menasanan di ‘braindrain’ i ‘braingain’, ku komo pregunta sentral: kon bo ta logra haña bonerianonan ku a bai den eksterior pa nan estudio bèk pa duna un aporte na desaroyo di Boneiru na kaminda pa e komunidat ideal ku Kolegio Ehekutivo ta konstruyendo rumbo pa 2030?
Despues di e palabranan inspirativo di gezaghebber Rijna e partisipantenan a forma 6 grupo di trabou pa papia tokante nan ideanan i pone esakinan riba papel. E kosecha tabata grandi ku hopi desénas di sugerensia hopi konkreto i tin biaha sorprendente. Un di e gruponan di trabou a bini ku un solushon pragmátiko pa pone un fin na e ‘braindrain’ òf en todo kaso redusí esaki: sòru pa ampliá e oferta di formashon na Boneiru mes i prinsipalmente pa loke ta trata estudio pa profeshonnan ku nos isla tin mester di nan, esaki den koperashon ku institutonan di formashon den eksterior i tambe hasiendo uso di internèt.
Gezaghebber Rijna a keda impreshoná pa e kontribushon di e gruponan di trabou. El a elogiá e entusiasmo di tur e partisipantenan i nan disponibilidat pa yuda pensa tokante un mihó Boneiru. E mandatario ta bai bèk Boneiru ku tur e ideanan ku e gruponan di trabou a presentá, kaminda ta agregá nan serka e resultadonan di e seshonnan ku a tuma lugá kaba riba nos isla i esunnan ku nan ta bai tene durante e lunanan binidero. Dia 10 di òktober – eksaktamente 10 aña despues di 10-10-10 – ta presentá e resultado final den forma di e Plan Maestro Boneiru 2030.
Por mira un reportahe fotográfiko di e enkuentro na Den Haag riba página di facebook di Masterplan Bonaire 2030.
Athunto un impreshon fotográfiko di e seshon di Plan Maestro na Den Haag. Na momentu di publikashon por fabor menshoná: Potrètnan di Nico van der Ven
![Bonerianonan Ultramar Ta Duna Kontribushon Sorprendente Pa Plan Maestro 155 Gez 1A](https://earubianonews.com/wp-content/uploads/2020/02/Gez-1a-800x469.jpg)
![Bonerianonan Ultramar Ta Duna Kontribushon Sorprendente Pa Plan Maestro 156 Gez 2A](https://earubianonews.com/wp-content/uploads/2020/02/Gez-2a-800x386.jpg)
![Bonerianonan Ultramar Ta Duna Kontribushon Sorprendente Pa Plan Maestro 157 Gez 3A](https://earubianonews.com/wp-content/uploads/2020/02/Gez-3a-800x541.jpg)