KRALENDIJK, Bonaire
ezaghebber Edison Rijna a partisipá na e asina yamá konferensia di alkalde na Hulanda. Riba invitashon di e Sosiedat Hulandes di Alkalde (di kua èks minister di Asuntunan Interno i Relashonnan den Reino Liesbeth Spies ta presidente) gezaghebber Rijna riba un di e dianan di konferensia a tuma e asina yamá diskurso di mesa na su enkargo. Gezaghebber Edison Rijna a konta su oudiensia tokante e posishon spesial ku Boneiru desde aña 2010 ta okupá den e sistema estatal hulandes komo entidat públiko.
‘Den hopi sentido Boneiru, meskos ku nos islanan ruman Sint Eustatius i Saba ku nos ta forma Hulanda Karibense kuné, ta parse munisipionan na Hulanda. Na mes momentu e diferensianan ta grandi. Segun mi opinion personal riba sierto terenonan e diferensianan aki ta muchu grandi’, segun Rijna ku en konekshon ku esaki a mustra riba e promesa ku lo a pone e fasilidatnan riba un nivel ku ta akseptabel dentro di Hulanda. ‘Pa loke ta trata enseñansa, kuido di salú i siguridat a kumpli ku e promesa aki, riba otro terenonan – manera kombatimentu di pobresa, infrastruktura i desaroyo ekonómiko – tin hopi trabou pa hasi ainda pa e ministerionan enbolbí.’
Gezaghebber a hasi uso di e oportunidat pa kita un malkomprendementu persistente for di kaminda: ‘Ku regularidat mi ta lesa i tende – tambe di hendenan ku lo mester sa mihó – ku ta masha hopi sèn mes ta bai pa nos islanan. Si, ta bèrdat ku pa medio di fondo di BES i pagonan ku un meta spesífiko (doeluitkering) meskos ku munisipionan na Hulanda nos ta risibí un kontribushon finansiero di reino. Pero loke nunka niun hende no ta bisa aserka ta ku nos 21.000 suidadanonan huntu ku e kantidat chikitu di empresa den nos komunidat anualmente ta aportá mas ku 140 mion euro pa medio di impuesto i prima na kaha di estado.’
Rijna a elogiá e koperashon ku munisipionan ku nos ta hasi ‘twinning’ kuné i enfrente e alkaldenan a ekspresá e deseo ku mas munisipio lo ta dispuesto pa kompartí nan konosementu i eksperensia ku Boneiru. Tambe (ku un kinipí di wowo) el a sugerí e organisashon pa tene un siguiente konferensia di alkalde na un sitio kaminda ta reina un mihó klima.
