KRALENDIJK, Bonaire
Gezaghebber Edison Rijna a hasi uso di su bishita di trabou na Hulanda Oropeo pa konsultá ku e ambasador di Merka Pete Hoekstra tokante e posibel konsekuensianan pa Boneiru di e sanshonnan ku Merka a dekretá kontra Venezuela. E sanshonnan tin impakto riba suministro di petroli pa terminal di Bopec ku e produktor di energia Contour Global mester pa generá elektrisidat den e periodonan ku oferta di energia di bientu i solo no ta sufisiente pa proveé den e pedida.
Aña pasá Merka a otorgá Boneiru un dispensashon temporal di manera ku tòg Contour Global por a disponé di e kombustibel nesesario durante e último lunanan. Na luna di mart e dispensashon aktual ta vense, loke tabata e motibu pakiko gezaghebber Rijna durante su konsulta ku ambasador Hoekstra a pidi pa prolongashon. Durante e kombersashon e ambasador a pone énfasis riba e bon relashonnan entre su pais i Reino Hulandes i a konta ku ta ku plaser e ta rekordá e bishita di sera konosí ku el a hasi aña pasa na Boneiru. Gezaghebber Rijna a invitá ambasador Hoekstra pa bin selebrá Dia di Boneiru e aña aki na Boneiru.
Sigurá suministro di kombustibel ta e tópiko di kombersashon tambe durante e konsultanan ku gezaghebber Rijna i diputado Elvis Tjin Asjoe tin e siman aki ku diferente ministerio.
Riba potrèt:
Ambasador Pete Hoekstra a pone énfasis serka gezaghebber Edison Rijna riba e bon relashonnan entre su pais i Reino Hulandes.
Na momentu di publikashon di e potrèt por fabor menshoná: Foto Nico van der Ven
