ORANJESTAD,Aruba
Parlamentario Endy Croes ta felicita Movimiento Electoral di Pueblo MEP cu su 49 aniversario di existencia. Lider maximo inmortal Betico Croes riba un diamars 9 di februari 1971 a funda e partido MEP. Un partido cu un ideologia social democrata pa yuda e dolornan di henter comunidad cuminsando pa libera Aruba di Antias, esta e famoso “Status Aparte”.
Betico e kere fuertemente cu Aruba mester por ta baas den su propio cas y a pone su dilanti e meta pa usa tur strategia y forsa di su alma pa logra y concretisa esaki cual el a logra tambe. No tabata facil. Den e Himno di MEP esaki ta refleha: “Uni den fila di MEP pa Aruba su libertad. Nos tur lo marcha sigur cu inmenso corahe y balor. Hunto lo logra pa tur e Status Apart, locual nos pueblo ta lucha pe”. Esakinan ta entre otro e letranan den Himno di MEP cu a wordo funda pa Betico Croes dia 9 di februari 1971.
Nos ta orguyoso di Un Lider cu un vision solido pa libera Aruba. Den e proceso aki a logra unifica e pueblo, percura pa nos himno y bandera, propio gobierno, parlamento, gobernador, percura pa nos propio moneda, nos idioma, nos Banco Central pa nombra algun y asina logra kibra e cadena di esclavitud y di cual e lucha pa libertad ta ancra den nos himno.
MEP a conoce den su trayectorio 3 Lider grandi. Betico Croes inmortal constructor y realisador di nos Status Aparte, Nel Oduber kende a guia MEP pa 25 aña y a logra pone Aruba riba pia y a scrap e fecha di independencia y actualmente Evelyn Wever Croes den e fase di rescata y construi un mihor Aruba pa nos yiunan y nos futuro generacion.
Pabien Movimiento Electoral di Pueblo, pabien MEP, pabien na tur e votadornan y sostenedornan kendenan semper a mantene MEP na 7 asiento of mas desde cu MEP a wordo funda dia 9 di februari 1971. Pabien Aruba.
Danki Betico pa Bo vision y sacrificio, Danki Nel pa Bo perseverancia di mantene MEP y su ideologia bibo y grandi, Danki Evelyn pa traha duro pa rescata Aruba di un situacion financiero debil y un Mega Debe cu a hereda e pais aki na 2017. MEP mas duro cu nunca. Tanten cu MEP t’ey, Aruba ta salba!
![Parlamentario Endy Croes Ta Felicita Partido Mep. Movimiento Electoral Di Pueblo A Cumpli 49 Aña Di Existencia 155 Beticfl2](https://earubianonews.com/wp-content/uploads/2020/02/beticfl2.jpg)
![Parlamentario Endy Croes Ta Felicita Partido Mep. Movimiento Electoral Di Pueblo A Cumpli 49 Aña Di Existencia 156 Aaa 6](https://earubianonews.com/wp-content/uploads/2020/02/aaa-6.jpg)