ORANJESTAD,Aruba
December ultimo CAFT a duna su conseho riba presupuesto 2020 y e efecto di e leynan cu ta forma parti di e di dos fase di e reforma fiscal ainda desconoci pa Parlamento. Den e conseho aki CAFT un biaha mas a instrui Gobierno pa aproba e cuentanan anual for di 2016. Na 2018 partidonan den coalicion a desaproba e ley cu ta determina e saldo pa aña 2016, creando un kiebre den e ciclo di dunamento di cuenta despues di hopi esfuerzo. Parlamentario Richard Arends (AVP) ta lamenta cu te dia di awe e hecho aki ta forma parti di e consehonan di CAFT.
“Un gobierno tin e responsabilidad pa determina e saldo di entrada y gastonan irrespectivamente di e aña,” asina Parlamentario Richard Arends splika. “Tratamento di e cuenta anual tin como meta pa fiha e resultado di un aña presupuestatio, den caso aki aña 2016, a base di investigacion di hechonan hasi door di Algemene Rekenkamer. E ley no ta regarda aprobacion of desaprobacion di maneho,” e la sigui bisa. “Aprobacion di un cuenta anual, no mester wordo confundi cu aprobacion di un presupuesto supletorio na final di aña.”
Consecuencia di esaki ta cu si bo no tin un saldo fiha pa aña 2016, bo no por entrega e cuenta anual di e añanan consecutivo, segun Parlementario Arends. Pa loke ta trata 2016, Algemene Rekenkamer ta conclui cu e deficit a mustra un mehoria fuerte compara cu 2015 y entradanan tambe a aumenta. “Nos ta papiando aki di un un reduccion di riba 230 miyon den 4 aña. Esaki lo mester a sigui pa un reduccion di 75 miyon mas na 2017 y un surplus di 25 na 2018 cual e Gobierno actual no a sa di mantene su mes na dj’e,” Parlamentario Richard Arends a splika.
Parlamentarionan cu ta sostene Gobierno kier manda e cuenta anual Algemene Rekenkamer back. “Esaki lo no cambia nada den e hechonan cu nan a investiga caba, ni tampoco e cifranan ni e resultadonan. Contrario di fortifica posicion di e colegionan halto di estado, manda e cuenta anual back lo atacha independencia di e colegio di estado aki y mina su autoridad.” Parlamentario Arends a splika. For di oposicion seguramente nos a pone nos diferenciaban politico un banda y a atende e asunto aki na serio. “Awe nos ta back na e situacion prome cu aña 2011 unda cu Pais Aruba no por determina e saldo di aña 2016 y asina sigui cumpli cu e obligacion constitucional pa falta di boluntad y entendimiento di e materia. Esaki siguramente ta manda un señal completamente robes local y internacionalmente y ta limita e supervision financiero.
Te cu aña 2011 Aruba no tabata conoce un proceso di duna cuenta riba gastonan y entradanan. Parlamentario Arends a splika cu na aña 2011 a inicia un proceso hunto cu Algemene Rekenkamer di Aruba y Hulanda, hunto cu Gobierno y Parlamento pa elimina e atrasonan den e cuentanan annual y prepara e infrastructura administrativo pa hasi entrega di cuenta anual un proceso institucionalisa. Na aña 2013 a aproba un total di 50 cuenta anual, di cual 25 tabata corresponde na Pais Aruba. E cuenta mas biew ta regarda e cuenta di anja 1962 di teritorio insular di Aruba. E cuenta anual di aña 2015 ta e ultimo cu a ser aproba.
