ORANJESTAD,Aruba
Diahuebs durante un mainta masha ameno y alegre, Minister di Transporte, Comunicacion y Sector Primario, sr Chris Romero, a bishita Colegio Conrado Coronel pa asina haci inauguracion oficial di nan Hofi Amistad.
Hofi Amistad ta un iniciativa di Minister Romero hunto cu Santa Rosa/DLVV unda cu ta busca pa incentiva nos muchanan pa dedica tempo den plantamento. Door di cuminsa inculca e cultura di plantamento den nos generacionnan di mas hoben, nos ta trahando e caminda pa un Aruba cu den futuro lo por tin un autonomia pa loke ta cuminda.
E intencion ta pa tene un competencia di Hofi Amistad tur aña, unda cu muchanan di scolnan basico di nos isla por participa door di manda nan opstel di con nan vision ta pa un hofi den nan scol. Den e prome edicion di Hofi Amistad e scol ganador tabata Colegio Conrado Coronel y awor nos por mira cu nan plantacion a cuminsa duna fruta caba.
Minister Chris Romero a keda sumamente satisfecho di mira e entusiasmo den e muchanan cu ta na encargo pa mantene nan Hofi Amistad, locual ta demostra cu e iniciativa di Santa Rosa ta uno necesario pa incentiva e amor pa plantamento den nos muchanan.
![Minister Chris Romero A Haci Apertura Oficial Di E Prome Hofi Amistad Na Colegio Conrado Coronel 155 1 4](https://earubianonews.com/wp-content/uploads/2020/02/1-4.jpg)
![Minister Chris Romero A Haci Apertura Oficial Di E Prome Hofi Amistad Na Colegio Conrado Coronel 156 2 5](https://earubianonews.com/wp-content/uploads/2020/02/2-5.jpg)
![Minister Chris Romero A Haci Apertura Oficial Di E Prome Hofi Amistad Na Colegio Conrado Coronel 157 3 3](https://earubianonews.com/wp-content/uploads/2020/02/3-3.jpg)
![Minister Chris Romero A Haci Apertura Oficial Di E Prome Hofi Amistad Na Colegio Conrado Coronel 158 4 2](https://earubianonews.com/wp-content/uploads/2020/02/4-2.jpg)