ORANJESTAD,Aruba
Un iniciativa di Sociaal Crisis Plan y partners.
Na januari 2020 SCP a lansa su campaña nobo, yama ‘Ban cuida nos muchanan den temporada di Carnaval’, cu ta un campaña pa informa y conscientisa nos comunidad riba e topico di salud y seguridad di nos muchanan durante e paradanan di carnaval.
SCP hunto 34 partners lo ta activo ariba e topico aki durante e temporada mas druk di Carnaval y materialnan di comunicacion lo sali ariba entre otro television, rednan social, radio y corant.
E meta principal di SCP ta pa conscientisa nos comunidad riba e importancia di e salud y seguridad di muchanan durante e temporada di Carnaval y cu cada mayor ta carga e responsabilidad aki. SCP kier invita pueblo di Aruba pa bin experencia Carnaval door di e wowo di un mucha por medio di un instalacion audiovisual cu lo ta presente na varios locacion durante e temporada di Carnaval. Nos lo lansa nos instalacion audiovisual riba Plaza Daniel Leo na Oranjestad riba Diasabra 1 Februari di 4or pa 6or di atardi. Nos mester ta mas consciente cu pa muchanan bou di 5 aña e paradanan di Carnaval por ta dañino pa nan salud y bienestar. Decibel mucho halto, solo fuerte, alcohol den nan sercania y falta di soño ta algun factornan cu no ta bon pa nan y por tin efecto negativo ariba na bida.
Pa mas informacion of conseho pa e cuido di mucha den temporada di carnaval tuma contacto cu Tienda di Educacion na 161 (yamada ta gratis). Pa mas informacion di e campaña di SCP por tuma contacto na 5281100.
![“Ban Cuida Nos Muchanan Den Temporada Di Carnaval” 155 Aaa 17](https://earubianonews.com/wp-content/uploads/2020/01/aaa-17-449x600.jpg)