ORANJESTAD,Aruba
Recientemente e Fundacion ESOLO, den presencia di
S.E. Gobernador di Aruba, Sr. Alfonso Boekhoudt, organisacion colaborador y invitadonan a inaugura y introduci officialmente e programa di salud pa muchanan cu ta yama Cool2BFit.
E programa ta pa muchanan entre 4 pa 13 aña di famia di menos recurso cu tin problema cu sobrepeso.
Segun cifranan di Unesco (2013) 35% di muchanan na Aruba ta sufri di sobre peso.
Fundacion ESOLO por medio di e programa Cool2BFit kier combati e problematica aki.
Sra. Alice van Romondt representante di Fundacion ESOLO a tuma palabra y a splika e meta di Fundacion ESOLO. Sra. van Romondt a introduci e colaboradornan y tambe kiko ta nan rol pa cu e programa aki. Na su turno a sigui sra. Miriam Baiz cu ta coordinador di e programa Cool2BFit y tambe coordinador di e commission Scol Saludabel. Sra. Baiz a splica kiko ta e programa Cool2BFit y e function di Fundacion ESOLO den esaki.
E objetivo di e bunita inciativa di Cool2BFit na Aruba ta pa tuma un enfoke holistico riba e problematica di obesidad y pesey a introduci e “Team di intervencion”. E team ta consisti di un dietista, coach di movecion/fysiotherapeut y un experto den comportacion di mucha. Tambe tin varios colaborador cu lo tin un rol hopi importante den e realisacion di e programa.
Directie Volksgezondheid como un partner y colaborador ta desea Fundacion ESOLO tur clase di exito pa cu e projecto aki.
