ORANJESTAD,Aruba
Aki 15 dia e funcionarionan di Inmigracion John Matias Hodge y Shamila Daniela Garrido ta haya sa e decision di Corte den e caso penal cu a cuminsa contra nan.E dos funcionarionan aki a haci manipulacion den e Sistema di control pa personanan stranhero (Latino) por a drenta Aruba siendo cu nan no a cumpli cu reglanan. Durante tratamento di e caso por a saca afo cu esun cu tabata guia e proceso tabata e acusado Hodge y Garrido a yud’e den esaki, pero ta nenga di a haya pago pa esaki. “El a pidimi djis yud’e,” el a bisa. Nan a wordo acusa cu den e period di januari, 2018 pa mei, 2019, a haci nan mes culpabel den “mensen smokkel”. Pa haci esaki, a falsifica documentonan y a cambio di yuda e hendenan, a haya pago. Mirando cu nan a traha hunto, cu mas persona mas cu tabata haci e pagonan, a acusa nan di ta forma parti di un organisacion criminal.
Hodge tabata esun cu a hunga un rol mas grandi den e caso aki, pasobra tur cos a cuminsa ora cu el a haci manipulacionnan pa su pareha por a drenta Aruba, apesar cu su nomber ta poni riba blacklist ora cu a sak’e na October, 2018. Pa e muhe aki, di Venezuela, por a drenta Aruba, e funcionario Hodge a haci tur e areglonan localmente cu ta wordo exigi, y hasta el a haci cambio den e Sistema den computer, a percura pa e ta trahando ora cu e muhe yega, y no a stempel e paspoort na su entrada. Esaki pa autoridadnan no ta na altura di su fecha di entrada. Pero e no a keda na pareha di Hodge so, pasobra na mei di aña pasa, cual caso a pone e investigacion cuminsa, tin tres hende muhe a drenta, siendo cu legalmente nan no por a haci esaki. E dia ey Hodge no tabata traha, pero a pidi ayudo di su colega Garrido. Supuestamente el a convence su colega door cu el a sigura cu nan tin pasashi pa sali bek di Aruba y cu e ta na altura na unda nan ta bay keda. Garrido a declara tambe cu su eror tabata cu el a confia den palabra di su colega y no a controla e datonan. Pero loke ta pone duda den e splicacion aki ta cu Hodge a mustra Garrido e potret di e tres muhenan. Tur esaki e mes ta admiti, pero e no a haya placa. Si e ta admiti di a pidi su colega prest’e 400 dollar e dia ey. Pero esaki no tabata pa motibo di e yud’e pa laga e muhenan drenta Aruba. A mustr’e cu e movecion aki ta mustra manera cu e ta cobra pa e fabor haci. E acusado Hodge mes ta bisa cu e no sa si esey tabata e caso, pero cu si den pasado el a yega di presta Garrido placa caba. Esey no tabata e unico manipulacion cu Garrido a haci. El a permiti su amigo tambe drenta Aruba, pasobra, segun el a splica, e tabatin peticion pa su di 9 permiso andando caba. El a yuda dos otro persona mas, pareha, cu tabata illegal, mas un otro persona mas. E forma cu el a manipula ta den nan paspoort y otro documentonan, cu nan a yega cierto dia Aruba. Esaki mientras cu nan tabata riba e isla caba illegal, pasobra a pasa nan dianan di estadia. Hunto cu Hodge tabata haci e cambionan, por ehempel, haci comosifuera nan a biaha pa Boneiro, ta yena number di vuelo y stempel e paspoort. Nada di esaki tabata berdad. Un manipulacion completo cu Ministerio Publico a bisa a pone un mancha riba e departamento importante aki di pais Aruba. Pais Aruba mester por confia riba e integridad di e departamento aki y su funcionarionan pa siguridad di e isla. Analisando rol di cada uno, Fiscal ta haya cu acusado Hodge tabata esun cu ta guia e operacion pa kende el a pidi 24 luna incondicional y pa su colegal Garrido 21 luna. Dia 13 di februari tin sentencia.